IPG sertifika Benefisiáriu Programa Estájiu Profisionál na’in-10 husi FDCH. Imajen/Florencio Miranda Ximenes

DILI, 09 marsu 2020 (TATOLI)Insitutu Petróleu no Jeolojia (IPG, sigla portugés) fó sertifikadu ba benefisiáriu estájiu profesionál husi Fundu Dezenvolvimentu Kapitál Umanu (FDCH, sigla Portugés) iha área petróleu no minerál.

Programa estájiu profesionál ne’e, atu fó apoiu ba programa Governu nian iha área dezenvolvimentu rekursu umanu, liuliu iha setór petróliu iha Timor Leste, nune’e FDCH koloka estajiáriu hamutuk ema na’in-10 hodi hala’o estájiu profesionál no prátika peskiza, hahú hosi inísiu fulan-setembru 2019 to’o 10 marsu 2020.

“Parabés ba imi. Ha’u husu imi atu lori esperénsia ne’ebé hetan iha IPG sai hanesan bukae ida hodi buka servisu”, tenik Prezidente IPG, Hélio Casimiro Guterres, hafoin entrega sertifikadu ba benefisáriu sira iha edífisiu IPG, iha rotunda Elemloi, segunda ne’e.

Dirijente ne’e dehan, husi estájiu ne, benefisiáriu sira mós hatene ona lala’ok jeolojista nian ne’ebé presiza estudu no investiga hodi hatene rikusoin Timor-Leste nian hanesan mina no gás, rai-henek, mármore no semente, molok halo esplorasaun no lori ba merkadoria.

“Agradese tebes tanba durante fulan-neen estajiáriu sira hamutuk ho ekipa IPG halo ona estudu balun maski seidauk finaliza, maibé la’o ho di’ak”, Dirijente ne’e salienta.

Nia dehan, durante estájiu profionál, benefisiáriu sira hanesan parseiru servisu hodi aprende iha área ne’ebé seidauk hatene, nune’e bele hasa’e koñesimentu bolseiru sira ne’ebé finaliza ninia estudu iha Malázia durante tinan-rua, maibé seidauk hetan servisu.

Sorin seluk, Diretora Ezekutiva FDCH, Leila Carcéres dos Santos, agradese ba IPG ne’ebé fó fatin ba benefisiáriu sira hodi hala’o estájiu profisionál durante fulan-neen, hodi hetan esperiénsia iha setór peskiza petróleu no minerál nian.

“Ha’u agradese no orgullu ba IPG, liuliu ba benefisiáriu na’in-10 ne’ebé finaliza ona estájiu profisionál ne’e, tanba investe reukursu umanu importante liu atu dezenvolve nasaun ne’e ba oin,” tenik Diretóra ne’e.

Nia promete, sei kontinua buka tuir no rejista bolseiru sira ne’ebé hetan ona bolsu estudu, maibé fila mai seidauk hetan servisu tanba seidauk iha espereriénsia.

Leila Carcéres refere liután, ba programa estájiu profisionál ne’e iha impaktu pozitivu tanba bele hasa’e koñesimentu bolseiru dira, liuliu ba sira ne’ebé hetan ona bolsu estudu maibé seidauk hetan servisu.

Ho nune’e, nia apela ba bolseiru sira katak bainhira finaliza estudu iha rai-li’ur no fila, bele rejista iha programa Buka Tuir Benefisiáriu (BTB) atubele hatene bolseiru hira mak servisu no hira mak seidauk servisu, hodi ajusta ka koloka ba programa estájiu profisionál.

Nia informa, Hahú husi 2019 FDCH rejista ona  bolseiru hamutuk 128, ne’ebé na’in-63 no koloka ona ba insitutisaun 14 hodi hala’o servisu.

Benefisiáriu ba programa estájiu profesionál, Agustinho Pinto agardese ba FDCH no IPG ne’ebé fó ona oportunidade hodi aumenta tan esperiénsia iha área peskiza no investigasaun ba mina no gás, inklui minerál iha Timor Leste.

Molok IPG entrega sertifikadu estájiu profisionál sira, benefisiáriu na’in-10 aprezenta relatóriu finál durante fulan-neen durante prátika iha IPG  hanesan sistema Web Library, estudu literatura no sofrware Geolojia, análiza laboratóriu (Thin section and acetate peels), verifikasaun mina no gás matan iha Vemasse (Baucau) no Hatolia (Ermera), inklui manifestasaun ahi-suar iha Fahi-Lebo, Liquiça, estudu preliminária ba kualidade no kuanitdade rai-henek iha Timor-Letse no  estudu módulu Amplified Geochemical Imaging (AGI) iha Baucau no Viqueque.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here