Prezidente Institutu Petróleu no Jeolojia, Hélio Casimiro Guterres. Imajen/Mídia PR

DILI, 09 marsu 2020 (TATOLI) – Prezidente Institutu Petróleu no Jeolojia (IPG, sigla portugés), Hélio Casimiro Guterres, informa hahú husi estudu sistema petróleu no gás iha 2015 to’o 2019, institutu ne’e konsege halo ona indetifikasaun ba mina no gás matan iha rai-maran hamutuk 62 iha territóriu Timor-Leste.

“Ita ninia indetifikasaun ba mina no gás matan, ne’ebé ita rejistu to’o tinan-2019 hamutuk 62 ho kategoria makro, ne’ebé hatudu rezultadu di’ak ba konsentrasaun petróleu no gás ne’ebé mosu husi rai-okos mai iha rai-leten”, tenik Prezidente IPG ne’e iha ninia knaar fatin, Rotunda Elemloi, segunda ne’e.

Dirijente IPG ne’e realsa, iha fatin balun ne’ebé maka IPG deteta ona, maibé dezafíu maka rai halai hodi taka fatin identifikasaun hanesan akontese iha tinan kotuk ba Auto-Estrada Suai ne’ebé nakfera, IPG deteta iha posibilidade ba mina no gás atu mosu.

“Maibé difikuldade maka ita ninia natureza ne’ebé muda lalais no la fasilita jeolojista sira atu deteta mina no gás matan”, nia akresenta.

Prezidente IPG refere liután, kona-ba mina no gás matan hamutuk 62 ne’ebé rejista iha ona iha institutu ne’e la inklui mina no gás matan iha Alianbata, Viqueque no mina matan iha Betano, Suai nian.

Ho nune’e, nia dehan ba-oin IPG sei kontinua halo peskiza atu hatene ninia hun ho kle’an, hafoin entrega ba Autoridade Nasionál Petróleu no Minerál  (ANPM) atu halo esplorasaun.

“Ita sei kontinua buka hatene loos mina nia hun iha ne’ebé, hodi ita bele fó tutan fali ba reguladór hanesan ANPM atu fa’an ka halo esplorasaun”, nia salienta.

IPG ninia amostra hatudu potensialidade petróleu no Gás indentifikadu maioria iha Baucau, Viqueque, Lautem, Manu-Fahi,  Covalima no Rejiaun Administrativa Espesiál Oé-cusse no Ambeno (RAEOA).

Nune’e, iha tinan-2018, IPG indentifika mina matan foun iha Aldeia Matai, Lanuk no Karau-Ulun no iha Suku Debos, Munisípiu Covalima.

Institutu identifika potensialidade hirak ne’e, hafoin komunidade iha área refere sunu-rai no ikus mai hetan mina matan.

Antes ne’e, Xefe Unidade Petróleu no Gás IPG, Joanico Pires apela ba komunidade atu labele halo to’os besik mina matan ne’ebé identifikadu ona.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here