DILI, 08 marsu 2020 (TATOLI)–Liuhosi Konferénsia estraordinária, ohin, Partidu União Democrática Timorense (UDT) hamosu deliberasaun tolu hodi responde ba pedidu hosi Prezidente Repúblika (PR), Francisco Guterres “Lú Olo”, kona-ba rekezitu balun ne’ebé partidu koligasaun foun seidauk prenxe.

Hafoin Konferénsia, Prezidente Knua Profisionál UDT, João Pereira, le’e sai deliberasaun tolu ne’e mak primeiru, UDT reafirma pozisaun polítika hodi kontinua konsolida politika ba formasaun koligasaun foun ida hamutuk ho CNRT, KHUNTO, PD, PUDD no Frenti-Mudança, hodi harii Aliansa Maioria Parlamentár ida ba formasaun no funsionamentu IX Governu Konstitusionál.

Deliberasaun segundu, nia hatutan, UDT indijita Prezidente CNRT Kay Rala Xanana Gusmão nu’udár Primeiru-Ministru hodi lidera IX Governu Konstitusionál to’o mandatu nia rohan (2023).

Iha deliberasaun datolu, tuir nia, UDT reafirma ezisténsia politika ba distintu deputadu UDT nian iha Parlamentu Nasionál atu garante kontinuidade Aliansa Maioria Parlamentár foun ne’e ho sólidu, bodik ba governasaun foun ne’e to’o kinta lejislatura Parlamentu Nasionál nia rohan.

Nia hatutan, UDT reafirma ezisténsia politika ba membru Governu indijitadu husi UDT atu garante funsionamentu IX Governu Konstitusionál ida ne’ebé bazeia ba prinsípiu boa governasaun, bodik ba povu Timor-Leste nia moris to’o iha mandatu nia rohan.

“Konferénsia estraordinária ne’e realiza bazeia ba orientasaun hosi Prezidente Repúblika (PR), Francisco Guterres “Lú Olo”, kona-ba rekezitu jurídiku hirak ne’ebé koligasaun foun ne’e tenke kumpre, hafoin sorumutu ho koligasaun foun ne’ebé lidera hsi Prezidente CNRT Kay Rala Xanana Gusmão, hamutuk ho lider másimu KHUNTO, PD, PUDD, UDT no Frenti-Mudança iha loron 6 fulan marsu ne’e,” João Pereira hateten.

Pontu tolu ne’e, Prezidente Knua profisional UDT ne’e dehan, hatuur iha deliberasaun númeru I/UDT-CSP/III/2020, loron 8 fulan marsu, rezultadu Konferénsia Estraordinária União Democrática Timorense (UDT) ne’ebé haktuir ba dispozisaun hirak iha artigu 43,46 númeru 1 artigu 106 Konstituisaun RDTL, no bazeia ba artigu 2 no artigu 9 Leí partidu politiku sira, númeru 3/2004, loron 14 fulan abril.

Nia mós subliña katak, pontu tolu ne’e foti bazeia ba pontu “d” artigu 11 no pontu “c” artigu 15 estatutu UDT nian, nomós bazeia ba karta UDT ne’ebé haruka ba partidu CNRT kona-ba konfirmasaun votus konfiansa UDT ho Partidu Frenti-Mudança iha loron 24 fulan Janeiru 2020

Votus konfiansa ne’e,  nia haktuir, hodi fó fiar tomak ba CNRT atu lidera futuru koligasaun foun hodi ukun iha Governu, nune’e bele kontribui ba solusaun impase politika iha Timor-Leste.

Nia hatutan, pontu tolu ne’e mós foti bazeia ba deklarasaun konjunta koligasaun foun CNRT, KHUNTO, PD, PUDD, UDT no Frenti-Mudança hodi harii Aliansa Maioria Parlamentár iha Parlamentu Nasionál iha loron 22 fulan Fevereiru 2020.

Entretantu, konsellu superiór UDT ne’ebé partisipa iha Konferénsia estraórdináriu mak hanesan, Diresaun Nasionál UDT, membru konsellu konsultivu, representante UDT iha Parlamentu Nasionál, Diresaun Distrital Sira husi autoridade munisipál haat, husi administrasaun munisipál ualu no Rejiaun Adninistrativa Espesiál Oe-Cusse Ambeno (RAEOA), komisaun asuntu tékniku, Konsellu katuas, delegadu Juventude Sira, delegadu organizasaun espesiál ka órgaun feto UDT no delegadu UDT iha diáspora.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here