Konsellu Konsultivu UDT asina hamutuk no deklara rezultadu konferrénsia estraordinária iha Sede Nasionál Palapasu, Dili. Imajen TATOLI/Cipriano Colo.

DILI, 08 marsu 2020 (TATOLI)–Liuhosi Konferénsia estraordinária, ohin, Partidu União Democrática Timorense (UDT) hamosu deliberasaun tolu ne’ebé iha deliberasaun daruak fó konfiansa totál hodi indijita Líder Nasionál no atuál Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, atu lidera IX Governu Konstitusionál.

“Deliberasaun daruak iha Konferénsia estraordináriu nian maka UDT indizita Prezidente CNRT, Kay Rala Xanana Gusmão nu’udár Primeiru-Ministru hodi kaer IX Governu konstitusionál to’o mandatu nia rohan iha tinan 2023,” Prezidente Knua Profisionál UDT, João Perreira, deklara deliberasaun ne’e nu’udár rezultadu ikus husi Konferénsia estraordinária iha Sede Nasionál Palapasu, Dili, ohin.

Entretantau, João Perreira mós lee sai deliberasaun dahuluk maka UDT reafirma pozisaun polítika hodi kontinua konsolida polítika ba formasaun koligasaun foun ida hamutuk ho CNRT, KHUNTO, PD, PUDD no Frenti-Mudança, hodi harii Aliansa Maioria Parlamentár ida ho kadeira 34 asentu parlamentár nian, bodik ba formasaun no funsionamentu IX Governu Konstitusionál RDTL.

Iha deliberasaun datoluk, nia hatutan, UDT reafirma ezisténsia polítika ba distintu deputadu UDT nian iha Parlamentu Nasionál atu garante kontinuidade Aliansa Maioria Parlamentár foun ne’e ho sólidu, bodik ba governasaun foun ne’e to’o Kinta Lejizlatura Parlamentu Nasionál nia rohan.

Nune’e mós, nia husu ba membru Governu indijitadu husi UDT atu garante funsionamentu IX Governu Konstitusionál ida-ne’ebé bazeia ba prinsípiu boa governasaun bodik ba povu Timor-Leste nia moris to’o mandatu nia rohan.

Prezidente Knua Profisionál UDT ne’e informa, Konferénsia estraordinária ne’e realiza bazeia ba orientasaun husi Prezidente Repúblika (PR), Francisco Guterres “Lú Olo” kona-ba rekezitu jurídiku hirak ne’ebé koligasaun foun ne’e tenke kumpre, hafoin soru-mutuk ho koligasaun foun ne’ebé lidera husi Prezidente CNRT, Kay Rala Xanana Gusmão, hamutuk ho líder másimu KHUNTO, PD, PUDD, UDT no Frenti-Mudança iha loron 6 fulan marsu ne’e.

Entretantu, konsellu superiór UDT ne’ebé partisipa iha Konferénsia estraórdináriu maka hanesan Diresaun Nasionál UDT, membru konsellu konsultivu, representante UDT iha Parlamentu Nasionál, Diresaun Distritál sira husi autoridade munisipál haat, husi administrasaun munisipál ualu no Rejiaun Adninistrativa Espesiál Oé-Cusse Ambeno (RAEOA), komisaun asuntu tékniku, Konsellu katuas, delegadu juventude, delegadu organizasaun espesiál ka órgaun feto UDT, delegadu UDT iha diáspora.

Notísia Relevante: UDT Reafirma Pozisaun Fó Apoiu ba Koligasaun Foun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here