Padre Martinho G. da Silva Gusmão.

DILI, 08 marsu 2020 (TATOLI)—Padre Martinho Gusmão hateten, Prezidente Repúblika (PR), Francisco Guterres ‘Lú Olo’, sei aseita karta demisaun hosi Primeiru-Ministru (PM), Taur Matan Ruak, ne’ebé PM aprezenta ba PR iha  tersa (25 fevereiru 2020) fulan kotuk.

“Prezidente Repúblika laiha razaun atu la aseita karta demisaun Primeiru-Ministru nian. Tanba, PR mak husu eleisaun antesipada nu’udar rekursu ikus liu. Partidu polítiku sira ne’ebé iha asentu Parlamentár, buka halo movimentu polítiku hodi hetan solusaun ba impase polítika ne’e no kontinua mantein Taur Matan Ruak nu’udar Primeiru-Ministru to’o impase polítika ne’e rezolve. PM Taur Matan Ruak dehan lae ona, entaun rezolve númeru datoluk ne’e,” Padre Martinho Gusmão ko’alia asuntu ne’e hafoin observa konferénsia estraordinária PUDD nian, iha Hotel Vila Verde, Dili, domingu ne’e.

Padre Martinho Gusmão afirma, se Prezidente Repúblika la aseita karta demisaun PM nian signifika prezidente mak halo impase.

“Númeru daruak fó ba Parlamentu Nasionál no Xanana rezolve ona. Se prezidente la simu entaun prezidente foti fali nia desizaun. Se prezidente hakarak uza númeru dahuluk (Eleisaun Antesipada) ne’e de’it, la presiza ba númeru daruak no datoluk,” nia dehan.

Nia argumenta, bainhira Primeiru-Ministru hato’o demisaun bazeia Konstituisaun RDTL artigu 112 ne’e la fó marjen ba Prezidente Repúblika atu rejeita.

“Sobre tudo Prezidente Repúblika mak haruka. Prezidente Repúblika foti tiha ona desizaun, assim que nia aseita karta, nia foti ona desizaun. Agora ne’e Primeiru-Ministru Ein-ezersísiu, ema bolu Governu Demisioner,” nia hateten.

Nia hatutan, partidu sira ne’ebé envolve iha koligasaun foun halo kongresu hanesan ne’e kestaun administrasaun, la’ós kestaun polítika no legál.

“Kestaun konstituisaun Prezidente Repúblika laiha problema. Kestaun polítika laiha problema, iha de’it mak kestaun administrasaun katak prenxe lai ida-ne’e,” nia dehan.

Padre Martinho Gusmão akresenta, bainhira koligasaun foun prenxe tiha rekezitu ne’e maibé Prezidente Repúblika haruka ba Tribunál Rekursu mós bele, maibé Xefe Estadu tenke esplika prova legál.

“Nia bele halo ida-ne’e maibé nia tenke fó esplikasaun prova legál (bukti hukum) iha-ne’ebé. Keta halo, nia hatama depois tribunál prosesa fali nia,” nia esplika.

Notísia Relevante: PM Taur Aprezenta Ona Karta Demisaun

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here