DILI, 08 marsu 2020 (TATOLI)–Prezidente Komisaun juridisaun Partidu Frenti-Mudança (FM), José Pereira da Conceição hateten, Frenti-Mudança nafatin fó apoiu ba Prezidente Partidu Congresso Nacional da Reconstrução de Timor (CNRT), Kay Rala Xanana Gusmão hodi lidera IX Governu Konstitusionál.

“Ami Frenti-Mudança kontinua fó apoiu ba Kay Rala Xanana Gusmão hodi lidera IX Governu Konstitusionál ne’e,” Prezidente Komisaun Jurizdisaun Partidu Frenti-Mudança (FM), José Pereira da Conceição, hato’o ba Jornalista sira iha Otél Arbiru, Dili, ohin.

Relasiona ho koligasaun pasadu ne’ebé hamosu impase polítika hodi implika ba povu nia moris, nia argumenta,  FM la hanoin ba esperiénsia koligasaun pasadu nian maibé hanoin mak pasadu sai hanesan esperiénsia ida hodi hateke ba futuru no FM hakarak hanoin de’it ba prezente.

“Ha’u hanoin ita labele hateke ba kotuk. Buat ne’ebé pasadu husik ba pasadu maibé ita tenke hanoin ba prezente. Tanba FM iha nia objetivu katak oinsá mak iha solusaun ba impase ne’e, nune’e ekonomia bele la’o no povu bele moris di’ak,” nia dehan.

Nia dehan, atu minimiza povu nia terus iha impase polítika ida-ne’e  mak lori partidu FM hakarak hamutuk ho CNRT hodi bele lori povu ba moris di’ak.

Aleinde ne’e, nia dehan, Frenti-Mudança tama iha koligasaun foun ne’e nia objetivu prinsipál la’ós tanba buka kadeira maibé hakarak fó solusaun ba impase polítika liuhosi FM ninia envolvimentu iha koaligasaun foun refere.

“Ami-nia prinsípiu mak sulisiona impase ne’e. Maibé, ami la hanoin kadeira tanba kadeira buat seluk ida,” nia hateten.

Notísia Relevante: Frenti-Mudança Prontu Hamutuk ho Koligasaun Foun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here