Eis Membru Asembleia Konstituinte husi Bankada KOTA, Clementino dos Reis Amaral. Imajen/FB Clementino Amaral

DILI, 08 marsu 2020 ( TATOLI) – Eis Membru Asembleia Konstituinte husi Bankada Klibur Oan Timor Asuwa’in (KOTA), Clementino dos Reis Amaral, hakotu iis ho idade-83, iha domingu madrugada iha Hospital Nacional Guido Valadares (HNGV) tanba sofre moras fuan.

Reprezentante família Saudozu Clementino, João Francisco dos Reis Amaral, haktuir iha kinta ne’e katak matebian sente moras bee-doko no sira lori bá HNGV hodi halo tratamentu no durante tratamentu doutór sira halo diagnóstika no hetan rezutadu fuan bubu.

“Iha loron-rua tuirmai, matebian-nia kondisaun tun ba bebeik no iha domingu madrugada tuku haat matebian hakotu iis iha ospitál”, dehan Jõao Francisco ba Agência Tatoli iha mate-uma Comoro, domingu ne’e.

Nia realsa, durante ne’e matebian nunka sofre moras grave.

“Durante ne’e laiha moras boot ruma ne’ebé kauza matebian to’o hakotu nia vida. Matebian tuir ami-nia haree iha duni moras remátiku maibé ba halo tratamentu hela de’it no haree katak laiha problema tanba ne’e matebian kontinua hala’o ninia atividade. Maibé, ikusmai moras bee-doko, lori ba ospitál no ohin dadeer matebian hakotu iis”, nia akresenta.

Tuir nia, nu’udar família sente triste tanba lakon matebian nu’udar ema di’ak ida iha família, maibé tanba kestaun idade no planu Maromak-nian maka tenke simu.

“Ami hakarak nia bele moris tinan-lima tan, maibé la buat ida, ne’e planu Maromak maski ita triste tenke simu realidade”, nia salienta.

João refere liután, kona-ba seremónia fúnebre, família seidauk deside tanba sei hein família balun mai husi estranjeiru maka foin haloot.

“Ami hanoin seremónia funerál sei hein nia-oan sira husi Noruega to’o mai maka foin haloot, maibé konforme nia-oan boot sei haloot iha Simitériu Becuse, Dili”, João informa.

Reprezentante família matebian ne’e subliña, tuir ajenda funerál, matebian sei lori ba Parlamentu Nasionál hodi presta omenajen ikus nu’udar eis Membru Asembleia Konstituinte.

“Ami parte família la ezije buat barak ba Estadu, maibé hanesan ita hotu hatene katak matebian hanesan Membru Asembleia Konstituinte no Prezidente Partidu, ikusmai sai deputadu hamutuk Señor Manuel Tilman iha Partidu KOTA”, nia dehan tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here