Deputadu PD, Adriano do Nascimento. Foto TATOLI

DILI, 06 marsu 2020 (TATOLI)—Deputadu Bankada Parlamentár Partidu Demokrátiku (PD), Adriano do Nascimento hateten, Grupu Arte Marsiál (GAM) sira tenke fó hanoin ba malu bainhira sira-nia elementu balun halo problema ruma.

“Iha kampaña PD dehan loke, sira-ne’ebé halo krime ne’e individu, organizasaun laiha buat ida. Loke de’it ba depois mak ita aplika regra no lei. Ita labele polítiza organizasaun ne’e. Tanba, ha’u haree uluk ne’e politizasaun mak barak liu. Sira mós sai vítima. Ha’u hanoin importante mak tenke fó hanoin ba malu no rezolve rasik probelma bainhira elementu hosi grupu sira-ne’e halo problema ruma,” dehan Adriano do Nascimento ba jornalista sira iha resintu Parlamentu Nasionál.

Deputadu Bankada Demokrátiku ne’e akresenta, grupu sira-ne’e taka tiha, ema seluk baku-malu hodi duun de’it ba sira. Nia dehan, di’ak liu loke para elementu ruma halo problema karik bolu mak líder grupu sira atu responsabiliza.

“Ha’u hanoin, timoroan, importante mak fiar malu no fó hatene ba balu. Treinu tuir imi-nia misaun no vizaun. Tanba, sira mós treinu la’ós atu halo aat ba malu no halo aat nasaun,” nia dehan.

Nia haktuir, organizasaun balu eziste dezde okupasaun Indonézia nian no organizasaun ne’e ninia membru sira mós envolve-aan no kontribui ba luta libertasaun nasionál hodi liberta povu no rai ida ne’e.

“Ha’u hatene ida-ne’e. Uluk, ami halo demonstrasaun organizasaun lubuk ida fó eskoltu ba ha’u. Ita labele mai ho pensamentu negativu ida katak sira-ne’e mai atu estraga de’it. Ita ko’alia balun no ita fó fiar ba malu. Ha’u hanoin timoroan ho timoroan sei la halo aat ba malu. Kona-ba nesesáriu, ha’u hanoin partidu hotu-hotu halo promesa iha kampaña,” nia esplika.

Nia hatutan, sé iha kampaña partidu polítiku halo promesa tenke kumpri promesa polítika ne’e. Tanba, nia dehan, se PD mak tama Governu mós prioridade ida mak tenke loke ka reativa fali Grupu Arte Marsiál sira ne’ebé Governu taka iha tempu pasadu.

“Kestaun la’ós vantajen no dezvantajen. Ninia vantajem mak ne’e, ema kuandu treinu ne’e fizikamente nia saudavel no sira mós bele partisipa iha kompetisaun nasionál no internasionál lori nasaun nia naran. Vantajen seluk ne’e la’ós treinu fíziku de’it maibé aprende mós moral, sai treinadór ne’ebé la’ós arbiru. Kona-ba dezvantajen hanesan líder labele pesimista lai, hatuur ita-nia pensamentu iha pozitivu. Se ita líder ba kedas negativu entaun ita laiha vontade. Fiar lai sira katak buat ne’e di’ak,” nia dehan.

Notísia Relevante: KM Aprova Rezolusaun Reativa Arte-Marsiál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here