Imajen Espesiál

DILI, 07 marsu 2020 (TATOLI)—Partidu Congresso Nacional da Recosntruçao de Timor (CNRT), observa katak pedidu Prezidente Repúblika, Francisco Guterres ‘Lú Olo’, laiha konsisténsia tanba iha 2017 la husu rekezitu ba Partidu FRETILIN no PD ne’ebé forma koligasaun iha VII Governu Konstitusionál.

“Partidu CNRT observa katak Prezidente Repúblika-nia pedidu ne’e laiha konsisténsia ho nia aktu hirak ne’ebé hala’o ona iha tinan 2017, iha VII Governu Konstitusionál ne’ebé mak forma hosi Partidu FRETILIN no PD maibé la liu hosi Kongresu ka Konferénsia Nasionál ruma. Prezidente Republika ezije rekizitu legais hirak ne’e só ba de’it Partidu CNRT ho nia aliadu sira,” Sekretáriu Meza Konferénsia Extraordinária Partidu CNRT, Adérito Hugo da Costa, informa liuhosi konferénsia imprensa, iha Bairro dos Grilhos, sábadu ne’e.

Hugo konsidera rekezitu ne’ebé Prezidente Repúblika fó ne’e surpreza tanba la uza ba koligasaun ne’ebé forma hosi partidu FRETILIN no Partidu Demokrártiku iha 2017.

“Partidu rua ne’e forma Governu minoria ida la tau rekezitu sira-ne’e,” nia dehan.

Maske nune’e, nia hateten, Partidu CNRT kaer metin nafatin ba vontade polítika ida ne’ebé di’ak hodi kontribui ba solusiona impase polítika atuál.

Bazeia ba hanoin-hirak iha leten, Partidu CNRT liuhosi Konferénsia Ekstraordinaria loron-7 fulan-Marsu 2020, deklara katak Partidu CNRT orgullu ba povu nia maturidade.

“Partidu CNRT orgullu ba maturidade povu tomak ne’ebé kontinua hakmatek, mantein pás no estabilidade hodi hein desizaun ikus-liuhosi Nai Prezidente Repúblika,” Adérito Hugo hateten.

Nia afirma, movimentu koligasaun foun ne’e hala’o bazeia ba pontu tolu (3) ne’ebé xefe estadu deside liuhosi líder nasionál sira.

Dahuluk, eleisaun antesipada nu’udar rekursu ikus liu. Daruak, partidu polítiku sira-ne’ebé iha asentu parlamentár buka halo movimentu polítiku hodi hetan solusaun ba impasse politiku ne’e, no datolu mak kontinua mantein Taur Matan Ruak nu’udar Primeiru-Ministru to’o impase polítiku ne’e rezolve.

“Ponte ida mak partidu polítiku halo komunikasaun ba malu no tanba ida-ne’e mak Partidu CNRT loke komunikasaun no vontade polítika hosi CNRT rasik ho partidu sira seluk espresa sira-nia aspirasaun polítika hodi kontribui ba solusiona impase polítika,” nia dehan.

Entretantu, Komisaun Jurizdisaun Partidu CNRT, Carmelita Caetano Moniz haktuir, iha 22 fevereiru 2018 partidu CNRT halo tiha ona konferénsia nasionál ida ne’ebé autoriza CNRT nia estrutura másimu sira atu halo koligasaun no forma Aliansa Maioria Parlamentár hodi viabiliza VIII Governu Konstitusionál.

“Agora partidu CNRT iha tempu saida de’it, atu koliga ho sé-sé de’it, partidu CNRT só halo de’it akordu koligasaun. Akordu bele eskrita no akordu mós bele verbal. Ita iha konfiansa ba malu. Ita iha entendimentu di’ak ba malu para viabiliza Governu ida harii. Ne’ebé, labele hateten katak CNRT seidauk halo konferénsia,” nia esplika.

Maibé, tuir nia, Prezidente Repúblika ezije tenke halo tan konferénsia, entaun ohin Partidu CNRT halo konferénsia tan hodi reafirma liután Partidu CNRT konferénsia ida-ne’ebé CNRT hala’o tiha ona 22 fevereiru 2018 no sei vigora hela to’o agora.

Notísia Relevante: CNRT Husu Prezidente CNE Hasai Deklarasaun Tenke Imparsiál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here