Sekretáriu Estadu ba Formasaun Profisionál no Empregu, Julião da Silva. Imajen Tatoli/Egas Cristovão

DILI, 06 marsu 2020 (TATOLI)Sekretáriu Estadu ba Formasaun Profesionál no Empregu, Julião da Silva husu ba traballadór timoroan kuaze 3.000-resin, atu tuir regulamentu no orietasaun ne’ebé fó sai husi médiku sira iha Korea Súl, nune’e bele prevene-an husi Coronavirus.

Governante ne’e ko’alia kestaun ne’e, relasiona ho daudaun Sidade Daegu, iha Koreia Súl  hanesan sidade ne’ebé hetan uluk alastru Coronavirus no sidadaun balun hahú izola-an iha uma, enkuantu traballadór timoroan na’in-17 maka servisu iha sidade ne’e.

“Dadaun ne’e, entre Sekretaria Estadu ba Formasaun Profesionál no Empregu (SEPFOPE) hamutuk ho Ministériu Negósiu Estranjeiru no Kooperasaun (MNEK), inklui Ministériu Saúde (MS) kontinua akompaña dezenvolvimentu ka alastru Coronavirus iha Koreia Súl no ita husu ona adidu atubele asegura ita-nia sidadaun sira hodi labele afeta ba virus ne’e”, tenik Sekrétariu Estadu Julião ba Agência TATOLI iha Sentru Konvesaun Dili (CCD, sigla portugés), sesta ne’e.

Notísia Relevante: MNEK Otimista Sistema Saúde Korea Súl Bele Proteje Traballadór Timoroan Husi Coronavirus

Nune’e, SEFOPE nafatin komunika no orieta adidu traballadór sira atu kontinua hakbesik-an ba traballadór sira atu fó mensajen hodi bele prevene husi ameasa Coronavirus.

Julião da Silva akresenta, to’o agora trabaladór timoroan kuaze 3.000-resin maka iha Koreia Súl maibé seidauk iha traballadór maka afetadu husi Coronavirus tanba kuaze hela iha distánsia dook husi Sidade Daegu, Koreia Súl.

“Ita nia traballadór na’in-17 mak iha sidade Daegu ka sidade afetadu, maibé sira nia kondisaun di’ak hotu no livre husi Coronavirus”, nia akresenta.

Ho nune’e, nia husu ba traballadór sira atu kuidadu-an no asegura saúde, liuliu rona orientasaun ka regulamentu sira ne’ebé la’o iha Koreia Súl tanba sistema saúde iha nasaun ne’e di’ak tebes.

“Ami husu ba ita-nia trabaladór sira, labele sai ba fatin arbiru liuliu sidade ne’ebé afetadu, tanba ne’e tenke kuidadu-an no kontinua nafatin utiliza ekipamentu médiku protejidu ne’ebé fó sai husi médiku Koreia Súl”, nia sujere.

Julião haktuir, nia parte komunika ona Ministru Negósiu Estranjeiru no Kooperasaun, Dionísio da Costa Babo Soares no ho Ministra Saúde, Erlia António atu akompaña bainhira Coronavirus fó ameasa maka’as ba traballadór timoroan sira tenke halo evakuasaun ho lalais.

Antes ne’e, Ministru Negósiu Estranjeiru no Kooperasaun, Dionísio da Costa Babo Soares, informa Coronavirus ne’ebé mosu iha Xina hahú alastru ba nasaun Koreia Súl ne’ebé sai nasaun númeru dahuluk afetadu ona no kuaze ema na’in-900 mak afetadu ona ba virus ne’e.

Tanba ne’e Governu Timor-Leste fó fiar nafatin ba sistema saúde iha Koreia Súl atu proteje nia traballadór timoroan sira.

Ministru Dionísio dehan Embaxadór Timor-Leste iha Koreia súl, hamutuk ho adidu traballadór kontaktu ona trabaladór timoroan kuaze 3.000-resin atu kuidadu-an no kontinua akompaña dezenvolvimentu Coronavirus.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here