Imajen Mídia PR

DILI, 06 marsu 2020 (TATOLI)–Prezidente Repúblika (PR), Francisco Guterres “Lú Olo’, apresia ho koligasaun foun ne’ebé lidera husi Prezidente Partidu Congressu Nacionál Reconstrução Timorense (CNRT), Kay Rala Xanana Gusmão. 

Sekretáriu koligasaun foun, António da Conceição hato’o asuntu ne’e ba mídia hafoin hala’o audiénsia ho Prezidente Repúblika iha palásiu Prezidénsia Repúblika Bairru-Pité, Dili, ohin.

“Enkontru ne’e la’o iha ambiente ne’ebé di’ak. Prezidente Repúblika apresia tanba bele iha ona intensaun hosi koligasaun ida hodi hasoru malu ho Prezidente Repúblika. Prezidente Repúblika mós apresia ho karta de intensaun ne’ebé maka koligasaun foun aprezenta, hodi hakarak atu bele halo formasaun Governu ida. Maibé iha kondisaun balun ne’ebé maka presiza koligasaun ne’e rasik tenke ko’alia iha baze análiza jurídiku husi Prezidente Repúblika ninian. Tanba ida ne’e maka ami-nia enkontru ne’e, hanesan separa hela iha ne’e hodi labele kontinua lai ho buat hotu, desde kondisaun balun ne’ebé sei presiza atu Prezidente koligasaun hatan,” António esplika.

António mós konsidera enkontru ne’e produtivu no di’ak tebe-tebes tanba iha konversa husu no hatán husi Prezidente Repúblika ho mós Prezidente Koligasaun.

Koligasaun foun ne’ebé lidera husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein Ezersísiu UDT, Rudolfo Aprarício Guterres, Prezidente Interinu FM, Egídio de Jesus, no Prezidente PUDD, António de Sá Benevides.

Notísia Relevante: Koligasaun Foun Presiza Prenxe Rekezitu Balun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here