Ministru Negósius Estranjeirus no Kooperasaun Dionísio da Costa Babo. Imajen/ Tatoli

GLENO, 6 marsu 2020 (TATOLI)–Ministru Negósiu Estranjeiru no Kooperasaun (MNEK), Dionísio Soares da Costa Babo informa, komemorasaun loron feto internasionál presiza valoriza feto no define feto ninia papél iha Timor-Leste.

“Ita presiza valoriza feto no define feto-nia papél iha sosiedade, iha mundu liuliu iha Timor-Leste,” dehan Ministru Negósiu Estranjeiru no Kooperasaun (MNEK), Dionísio Soares da Costa Babo, ba jornalista sira hafoin partisipa iha selebrasaun loron feto internasionál iha salaun paróquia Gleno, Ermera, sesta (6/3/2020).

Nia hatutan, importante ba ita-bo’ot sira-nia prezensa ba halo asisténsia ne’ebé komemora ba loron feto internasionál hodi marka signifikadu tebes ba dezenvolvimentu no rekoñsimentu iha Timor-Leste.

Tuir nia, kontribui ba konsolidasaun ne’ebé brani atu kria oinsá mak rekoñese igualdade, partisipasaun no empoderamentu importante tebes ba feto sira.

“Fundamentál ba ita mak kria futuru ida foun no di’ak liuliu ba jerasaun foun ne’ebé mosu atu enkoraja feto nia direitu atu halo firme, asume sira-nia responsabilidade no uza sira-nia direitu ba movimenta espasu Liberdade,” nia hateten.

Iha biban ne’e, nia mós fó omenájen no fó respeitu ba feto hotu-hotu ne’ebé durante uluk to’o agora, ho prinsípiu ne’ebé hakarak atu konstrui futuru.

“Ha’u lori Governu TL nia naran fó omenájen no fó respeitu ba feto hotu-hotu iha TL ne’ebé ho prinsípiu hakarak konstrui futuru,” nia dehan.

Tanba, nia dehan, durante tinan hirak nia laran TL halo ona progresu barak no atu desimina valor universal direitu umanu no ekonómia, troka ideia, redusaun ba pobreza iha ita-nia rain ne’ebé sai ona realidade.

Nia dehan, Governu Timor-Leste mós buka dalan atu diminui taxa eskalarizasaun ba jovén feto sira.

“Ita mós buka atu diminui taxa eskalarizasaun ba ita-nia jovén feto sira ne’ebé durante iha ona signifiktivu dezenvolvimentu Nasionál, liuliu asesu ne’ebé ita fó hanesan saúde no buat seluk atu habesik no hametin di’ak liután feto sira-nia futuru.

Notísia Relevante: Aselera Progresu Igualdade, Presiza Ema Hotu Nia Kontribuisaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here