Konseleiru Superiór Partidu Kmanek Haburas Unidade Timor Oan (KHUNTO), José dos Santos Naimori Bucar. Imajen/Tatoli Egas Cristovao

DILI, 6 marsu 2020 (TATOLI)—Konselleiru Másimu Partidu Kmanek Haburas Unidade Nasionál Timor Oan (KHUNTO), José dos Santos Bucar “Naimori” hateten, ema balun kestiona kapasidade lideransa partidu KHUNTO nian maibé lakohi buka atu hatene ba buat seluk ne’ebé sira seidauk hatene.

Naimori afirma, dala barak ema dehan partidu KHUNTO ne’e kriminozu tanba Konselleiru Másimu Partidu Kmanek Haburas Unidade Nasionál Timor Oan (KHUNTO) nian, José dos Santos Bucar “Naimori”, ne’e iha tempu pasadu konsege tama no kastigu komarka.

“Ha’u dehan lae. La’ós hanesan imi ko’alia. Imi haree buat ne’ebé mak imi seidauk hatene. Dalaruma ema soe piada dehan katak beik, ha’u nonok no ha’u dehan sira la hatene. Husik sira ko’alia. Dalaruma ha’u hatete ba sira ‘labele haree buat ne’ebé imi haree, maibé buka-tuir buat ne’ebé imi seidauk hatene”, dehan Naimori iha ámbitu kongresu Partidu KHUNTO nian iha Sentru Konvensaun Dili (CCD-sigla portugés), ohin.

Naimori haktuir, partidu KHUNTO ne’e nia halo konseptu bainhira nia sei iha komarka Bekora. Maibé iha momentu ne’ebá eis Primeiru Ministru, Marí Alkatiri, atu ba vizita nia, entaun ema transfere nia ba komarka Gleno.

“Entaun ba iha Gleno, ha’u komesa halo ona katak partidu Kmanek Haburas Unidade Nasionál Timor Oan, ha’u rasik halo no ha’u rasik pinta Bandeira iha tempu kalan. Rezultadu mak ohin loron ha’u mós hamriik iha oin. Hosi imi-nia fiar, hosi buat ne’ebé mak imi haree no hatene rasik,” nia hateten.

Tanba ne’e, Konselleiru Másimu ne’e fó-sai katak, kongresu ohin atu restrutura fila-fali estrutura nasionál to’o iha hodi festa demokrasia ne’ebé sei akontese 2023.

Nia husu ba militante KHUNTO nian tau aan iha juventude ida-ne’ebé mak di’ak nune’e tempu ida fó fiar hodi bele sai lideransa ida-ne’ebé mak di’ak serbi nasaun foun ida-ne’e.

“Lideransa la mai hosi ema matenek de’it. Lideransa mós la mai hosi ema riku de’it. Lideransa mai hosi ita ema-nia hahalok rasik tanba ema-nia hahalok mak lori nia atu sai lideransa iha kualkér fatin ne’ebé de’it,” nia dehan.

Nia hateten, lideransa tenke respeita ema seluk no tenke rona ema nia opiniaun, krítika maibé tenke komprende mós lei uituan.

Nia afirma, ema hotu hakarak sai lideransa maibé lideransa la’ós fásil, lideransa tenke hakmatek ho pasiénsia

“Lideransa sira hanesan maun Xanana, Taur, Lú Olo, Alkatiri no Ramos Horta ne’e ita labele sukat ba ita jerasaun foun tanba sira mak funda estadu ida-ne’e hosi situasaun defísil”.

Naimori dehan, jerasaun foun atu aprende polítika tenke respeita lideransa nasionál sira.

Kongresu Partidu KHUNTO ne’e partisipa hosi estrutura nasionál no estrutura munisipál 12 inklui Rejiaun Administrativa Espesiál Oé-Cusse Ambeno (RAEOA). Delegadu ne’ebé partisipa iha kongresu ne’e hamutuk na’in-700. Kongresu ne’e rasik hahú hosi loron 6 marsu no ramata iha loron 8 marsu 2020.

Kongresu ne’e partisipa hosi Prezidente Parlamentu Nasionál, Arão Noé de Jesus da Costa Amaral, Eis Prezidente-Repúblika, José Manuel Ramos Horta, Sekretáriu Jerál FRETILIN, Marí Alkatiri, Prezidente Partidu Demokrátiku (PD), Mariano Assanami ‘Sabino’, Sekretáriu Jerál PD, António da Conçeição, Sekretáriu Jerál Partidu CNRT, Francisco Kalbuadi Lay’

Notísia Relevante: Naimori Dedika Múzika “Mate Ka Moris Ita Hamutuk” Ba Lider Nasionál Sira

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here