Logotipu Tribunál Distritál

DILI, 06 marsu 2020 (TATOLI) – Prokuradór Reinato Bere Nahac ne’ebé reprezenta Ministériu Públiku (MP), ohin, liuhosi audensia julgamentu solisita ba Tribunál Distritál Dili (TDD)  atu aplika pena prizaun tinan tolu (3) ba arguidu APM ne’ebé deskonfia envolve iha kazu sona Nelson Madeira iha Elemloi, Delta, Dili.

Notísia Relevante : Kazu Sona Nelson iha Elemloi, Tribunal Sei Konfirma CCTV

Liuhosi audiénsia julgamentu ne’ebé prezide hosi juiz koletivu António Fonseca, Afonso Carmona, Envangelino Belo, Prokuradór Reinato Bere Nahac hateten, tuir faktu ne’ebé arrola hosi MP no deklarasaun lezada nian iha julgamentu sira liu ba hatudu faktu no indísiu forte atu saran pena prizaun relevante ba arguidu nia hahalok krime.

Nia dehan, maske tribunál husu atu konfirma kamera CCTV hodi komprova liu tan faktu sira, maibé tuir nia, prosesu sira kleur nune’e la konsege hetan.

“Ministériu Públiku kontinua mantén ho faktu sira ne’ebé iha ho deklarasaun lezadu nian, katak arguidu mak momentu ne’ebá envolve iha kazu ne’e hodi hakanek lezadu,” afirma Prokuradór Reinato.

Defeza Germano Guterres Ramos hateten, deklarasaun arguidu nian iha julgamentu sira liu ba nega faktu sira ne’ebé aprezenta hosi MP, tanba la’ós arguidu mak envolve ka komete kazu ne’e.

“Ha’u fiar tribunál sei haree buat hotu hodi fó konfiska ba arguidu no parte defeza mós husu ba tribunál atu absolve,” hateten Germano Guterres Ramos.

Rona tiha alegasaun hosi MP, tribunál deside adia fila-fali julgamentu ba iha loron 23 marsu 2020, tuku 16:00 Otl.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here