Logotipu UNITAL.

DILI, 06 marsu 2020 (TATOLI)- Dekanu Fakuldade Ekonomia, Universidade Orientál Timor-Lorosa’e (UNITAL), Arlindo do Ceu Fátima informa dadaun ne’e parte universidade rekruta tan dosente ho grau mestradu hamutuk na’in ualu hodi reforsa prosesu aprendijazen ba estudante iha Kursu Jestaun Turístika Fakuldade Ekonomia.

“Ami-nia departementu la hetan akreditasaun dala rua husi ANAAA ho nivél lisensiatura ne’ebé ami hatun ninia grau akadémiku ne’e ba fali baxarelatu, agora ami iha ona mestradu na’in ualu mak fó ona apoiu ba prosesu ensinu aprendijazen ba estudante sira iha nivél baxarelatu nian,”dehan, nia ba TATOLI iha ninia servisu fatin.

Notísia Relevante :UNITAL Implementa Ona Rekomendasaun ANAAA

Antes ne’e Ajénsia Nasionál Avaliasaun Akreditasaun Akadémika (ANAAA) halo ona avaliasaun dala rua ba Kursu Jestaun Turístika Fakuldade Ekonomia UNITAL maibé la pasa iha prosesu akreditasaun tanba la prienxe padraun hanesan menus rekursu umanu no ekipamentu.

Nia dehan tan, oras ne’e hosi parte UNITAL mós kontinua simu Curriculum Vitae (CV) hosi kandidatu dosente Timoroan balun ho grau mestradu atu kontribui hodi hanorin estudante sira.

“Ami foin mak simu tan mestradu balun ne’ebé mai  aprezenta sira-nia dokumentu hanesan Curikulum Vitae (CV) ho intensaun hakarak apoiu UNITAL iha prosesu konstrusaun akadémiku ida ne’e,” nia esplika liután.

Iha tinan 2019, ANAAA la fó akreditasaun ba Kursu Jestaun Turístika Fakuldade Ekonomia UNITAL tanba ne’e maka estudante sira ne’ebé antes ne’e tuur ona iha semester VI to’o VIII tenke tranfere ba departementu jestaun ekonomia.

“Maske kursu jestaun ne’e ninia nivél hatun ona ba baxarelatu, estudante sira nafatin ho grau lisensiatura, maibe tenke tranfere ba fali departementu jestaun nia okos. Sira labele tama ona ba lisensiatura jestaun turístika maibé lisensiatura ekonómika,”nia haktuir.

Jornalista : Tomé Amado

Editór       : Agapito dos Santos 

HAKEREK NO HATÁN

Please enter your comment!
Please enter your name here