Labarik feto. Imajen TATOLI/ Jogerjo Guterres

DILI, 05 marsu 2020 (TATOLI)–Koordenadór Rezidente ONU, Roy Trivedy hateten, ema hotu-hotu hamriik atu hatete “Lae” ba normalizasaun violénsia hasoru feto no labarik feto sira hodi dehan “Sin” ba futuru ida ne’ebé feto ho labarik sira iha Timor Leste livre husi violénsia no bele kumpri sira-nia potensiál tomak.

“Ita hotu-hotu hamriik hatete ‘Lae’ ba violénsia no ‘Sin!’ ba futuru ida ne’ebé feto no labarik feto Timor-Leste sira livre husi violénsia,” dehan Roy Trivedy iha ninia deskursu iha lansamentu “Inisiativa Spotlight” atu hakotu violénsia hasoru feto, iha Hotel Timor, Dili, ohin.

Nia hatutan, atu feto no labarik feto Timor-Leste sira livre hosi violénsia, parte relevante sira tenke hakarak atu hamutuk hodi dehan “bele” no  tenke hatudu liuhosi asaun realidade moris loro-loron nian.

“Hamutuk, ita bele no ita tenke halo ida ne’e iha asaun atu nune’e bele sai realidade ida,” nia dehan.

Nia hatutan, liuhosi programa lansamentu “Inisiativa Spotlight” ida ne’e importante ba ema hotu hodi tau atensaun ba violasaun direitu umanu ida husi hirak ne’ebé prevalente no persistente liu iha mundu nomós violénsia hasoru feto no labarik feto sira iha Timor-Leste.

Tuir nia, ida ne’e importante tanba violénsia hasoru feto no labarik feto sira hamosu fitar ba individu sira. Tanba, nia dehan, violénsia impede ema atu alkansa sira-nia potensiál no afeta ba komunidade, sosiedade, nasaun no ekonómia.

Tanba, nia dehan, violénsia fó impaktu ba direitu umanu no dezenvolvimentu ema no nasaun hotu-hotu maske ninia prevalénsia no persisténsia, hasoru feto no labarik feto sira ne’e la normál.

“Ita hotu-hotu hetan benefísiu husi hapara violénsia hasoru feto no labarik feto sira,” nia hateten.

Tanba, nia haktuir, Sekretáriu Jerál Nasoens Unidas deklara momoos katak presiza iha mudansa ba relasaun podér hodi kria sosiedade ne’ebé iguál liu no iha ne’ebé kada individu la haree ba jéneru, abilidade seksual nune’e bele moris iha pás no dignidade.

Notísia Relevante: Governu Lansa “Inisiativa Spotlight” Atu Hakotu Violénsia Hasoru Feto

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here