Diretór Operasaun AIFAESA,IP, Gabriel da Costa. Imajen Tatoli/Egas Cristovão

DILI, 06 Marsu 2020 (TATOLI)Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa rezultadu inspesaun ne’ebé ekipa husi AIFAESA halo iha munisípiu Ainaro no Rejiaun Administrativa Espesiál Oé-Cusse Ambeno (RAEOA), identifika katak iha estabelesimentu 20 maka komete infrasaun.

“Foin lalais ami-nian ekipa rua ba halo inspesaun iha munisípiu Ainaro no RAEOA no husi rezultadu inspesaun ne’e rasik, konforme relatóriu ne’ebé sira submete ona mai ha’u nia meza, iha Ainaro sira hetan estabelesimentu ualu no iha RAEOA rasik estabelesimentu hamutuk 12 maka komete infrasaun”, tenik Gabriel ba Agência Tatoli iha ninia knaar fatin, Matadoro, kinta ne’e.

Nia realsa, tipu infrasaun ne’ebé maka operadór ekonómiku sira komete iha Ainaro no RAEOA kuaze hanesan, barak laiha lisensa no estabelesimentu ka loja no supermerkadu balun kontinua fa’an produtu liu prazu.

“Ami konsege halo apreensaun ba sasan sira durante halo operasaun no halo kedan prosesu auto-notísia ba iha operadór ekonómiku sira ne’e hodi submete ba ami-nian parte jurídiku, nune’e bele bolu sira hodi bele responsabliza sira ninia aktu ne’ebé sira halo, no hatan tanba saida maka kontinua komete infrasaun”, nia esplika.

Kona-ba sansaun ba operadór ekonómiku ne’ebé komete infrasaun, tuir Gabriel sira sei hetan sansaun administrativa hodi selu koima tuir Dekretu-Lei AIFAESA.

“Ha’u sempre dehan bebeik ona katak ba operadór sira ne’ebé maka komete infrasaun no kontinua fa’an sasan liu prazu, AIFAESA sei aplika koima no ida-ne’e aplika ona ba empreza sira, maibé atu selu koima ho montante hira, ami-nian parte jurídiku maka hatene. Ami só submete auto-notísia husi inspesaun no haruka ba sira maka deside. Empreza ne’ebé komete infrasaun todan ka kama’an ne’e sira maka hatene, hafoin deside hodi aplika koima ba empreza sira ne’ebé komete infrasaun”, Gabriel subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here