Diretór Operasaun AIFAESA.IP, Gabriel da Costa. Imajen Tatoli/Egas Cristovão

DILI, 06 marsu 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa farmásia balun iha Dili laran hahú inventa folin máskara.

Tanba ne’e, iha kinta (05/03) ekipa konjunta ne’ebé kompostu husi AIFAESA hamutuk ho Polísia Nasionál Servisu Investigasaun Kriminál (PNSIK) halo inspesaun urjente no deteta iha farmásia ida maka fa’an máskara ho folin la normál.

Inspesaun urjente ne’e, tanba simu reklamasaun husi komunidade kona-ba folin máskara ne’ebé la tuir folin normál.

“Sim, foin horisehik husi parte AIFAESA halo inspesaun tanba hetan keixa husi ita-nian komunidade dehan máskara ne’ebé maka fa’an iha Farmásia Moris Foun, Colmera, nia folin uluk sira fa’an $6 maibé agora ne’e fa’an fali ho folin $20”, dehan Gabriel ba Agência Tatoli, iha ninia knaar fatin, Matadoro, sesta ne’e.

Nune’e, husi parte PNSIK rasik foti kedan matéria máskara no halo prosesu ba iha Polísia Nasionál Timor-Leste (PNTL), Caicoli hodi halo investigasaun ba farmásia ne’e.

“Ohin ami halo kontaktu ho parte PNSIK rasik no dehan ohin loron sira submete ona prosesu ne’e ba iha Ministeriu Públiku tanba liga ba materiál ne’e kestaun krime”, nia dehan tan.

Hasa’e Folin Tanba Sosa Máskara Husi Indonézia

Diretór Operasaun AIFAESA realsa, tanba haree bele mosu indísiu krime liga ho matéria, AIFAESA rasik laiha kompeténsia atu halo atuasaun, nune’e halo koordenasaun ho PNSIK hodi observa direita ba farmásia ne’e.

“Farmásia Moris Foun iha prosesu inspesaun no identifikasaun, sira hateten katak máskara uluk sira fa’an ho folin ne’ebé maka kiik, maibé agora sira hasa’e folin tanba sasan ne’e mai husi Indonézia ne’ebé ho folin aas, entaun sira fa’an ba $20”, nia akresenta.

Gabriel esplika, antes ne’e folin máskara husi farmásia sira fa’an ho folin normál husi $3 to’o $5, maibé haree ba situasaun daudaun, liga ho Coronavirus mak ninia impaktu mai ekonomia, tanba ne’e hafoin simu reklamasaun husi komunidade, Autoridade Inspesaun halo kedan inspesaun.

“Situasaun hasa’e folin ne’e, ami konfirma duni ho parte Diretór Farmásia Moris Foun no nia  esplika katak sira hasa’e folin ba $20 tanba bazeia ba sira sosa fali husi Indonézia hafoin importa mai Timor-Leste no sira hasa’e folin $20 ba leten hotu”, katak Gabriel.

Nia haktuir tan, iha inspesaun ne’e Diretór Farmásia Moris Foun konfirma ba PNSIK no AIFAESA katak, máskara ho folin $20 ne’e baratu liu ona.

“Ami haree ba situsaun ida agora, ita nian nasaun kona krize ekonomia ida tanba kauza husi situasaun polítika no ida-ne’e impaktu. Ita labele hasa’e folin tuir ita-nia hakarak tanba perigu tebes. Tanba ne’e ami konsidera hanesan krime materiál”, nia afirma.

Farmásia Seluk iha Dili Laran Fa’an Máskara ho Folin Normál

Gabriel adianta, horisehik hafoin PNSIK no AIFAESA halo prosesu inspesaun no identifikasaun ba Farmásia Moris Foun, Colmera,  ekipa seluk desloka kedan ba farmásia rua iha Audian mak hanesan Farmásia Foho Osan Mean no Farmásia Hadomi.

“Ami halo kedan inspesaun iha ne’ebá hamutuk ho PNSIK no ami husu duni kona-ba folin máskara maibé sira fa’an ho folin normál hela no laiha folin máskara ne’ebé aas liu”, dehan Diretór Operasaun AIFAESA ne’e.

Nune’e, nia informa tan, iha sesta ohin ekipa PNSIK hamutuk ho AIFAESA kontinua halo inspesaun no identifikasaun ba farmásia seluk hamutuk 11 iha Dili laran.

“Ohin loron, ami kontinua servisu hamutuk ho parte PNSIK sira hodi halo inspesaun no identifikasau ba farmásia sira iha Dili laran, maibé formásia sira ne’e fa’an máskara ho presu normál nafatin no laiha mudansa. Iha farmásia ida de’it maka ami deteta katak nia fa’an ho folin sa’e maka’as maka Farmásia Moris Foun”, nia akresenta.

Kona-ba operadór ne’ebé inventa rasik folin sasan, tuir Gabriel materiál hanesan máskara ne’e krime, maibé parte AIFAESA laiha kompeténsia atu atua.

“Ami labele haree ba kestaun ne’e tanba liga ona ba matéria, tanba ne’e tenke submete ba parte Polísia ka PSIK maka bele haree kestaun ne’e. Ami labele deside atu fó filafali sasan ka lae, tanba ida-ne’e parte Polísia ninia kompeténsia”, Gabriel subliña.

Farmásia hamutuk 11 iha kapital Dili ne’ebé maka ekipa konjunta halo ona inspesaun no hetan fa’an máskara ho folin normál maka Hadomi Farmásia, Farmásia Foho osan mean, Farmásia instana group Unip, Lda, Aben Farmásia, Farmásia ISDE, Cito Farmásia, Farmásia Xiao Hu Unip. Lda, Farmásia Bonita Farma, Farmásia K24, Farmásia Prima Mart no Kura Hao Farmásia.

Farmásia hirak ne’e, fa’an máskara ho folin hahú husi $2,50 to’o $3 ba kada kaixa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here