Ekipa Konjunta Polísia Nasionál Timor-Leste (PNTL), Diresaun Nasionál Transporte no Terrestre (DNTT), Diresaun Nasional Patrimóniu Estadu (DNPE) no Komisaun Anti Korrupsaun (CAC) hala’o apreensaun ba karreta estadu sia (9) iha Ministériu Edukasaun Vila-Verde Dili ne’ebé ninia mákina no kadeira tuur fatin ema sobu hotu ona. Imajen/Eugénio Pereira

DILI, 06 marsu 2020 (TATOLI)- Komisáriu Komisaun Funsaun Públiku (CPF) ba asuntu Dixiplinár, António Freitas, promete sei hatún ekipa investigasaun hodi buka hatene Funsionáriu Públiku kargu xefia diresaun sira balun iha liña ministériu balun ne’ebé uza karreta estadu rua.

Notísia Relevante : Ekipa Konjunta Halo Apreensaun Ba Karreta Sia Hosi ME

Komisáriu António Freitas, afirma, ekipa konjunta Polisia Nasionál Timor-Leste (PNTL), Diresaun Nasionál Transporte  no Terrestre (DNTT), Diresaun Nasional Patrimóniu Estadu (DNPE) no Komisaun Anti Korrupsaun (CAC) sei halo identifikasaun ba karreta estadu nian hotu tenke rejista legál iha patrimóniu  estadu tuir dekretu lei Númeru 4/2008, nune’e bele evita kualkér funsionáriu públiku no ajente estadu uza patrimóniu estadu ba atividade individuál ka grupu.

“Iha informasaun ruma kona-ba kargu xefia sira uza karreta estadu rua, ami hetan agora sei dada kedas. Tanba ema ida uza karreta ida, so ministru sira maka uza karreta ida ba operasaun, (karreta) ida no ba operasionál, maibé diretór ne’e karreta ida, nia labele karreta rua no tolu fali,” dehan Komisáriu António  Freitas ba jornalista hafoin akompaña ekipa konjunta halo apreensaun ba karreta sia, ohin, iha Ministériu Edukasaun, Vila-Verde, Dili.

Notísia Relevante : Ekipa Konjunta Kontinua Halo Vizita Surpreza ba Instituisaun Estadu

Bazeia ba relatóriu hosi patrimóniu estadu aprezenta ba governu kada tinan governu gasta milaun $1-resin hodi halo de’it manutensaun ba karreta estadu hotu nian.

Nia dehan, marsu 2020 ba oin, ekipa reativa servisu konjunta inspesaun surpreza no asaun represivu ba Funsionáriu Públiku sira ne’ebé utiliza motorizada no karreta estadu (matrikula  G) ne’ebé kontra bandu no  regra.

Komisáriu António Freitas, lamenta dala ruma karreta estadu balun aat para iha funsionáriu sira nia uma, maibé kada fulan governu hasai osan ba kombustivel.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here