Aviaun Batik Air. Imajen/Espesiál

DILI, 06 marsu 2020 (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, informa responsável Batik Air iha kompromisu atu ajuda Timor-Leste hodi rezolve folin billete ne’ebé rezoável bainhira empreza aviasaun ne’e  ofisialmente halo ona operasaun iha Timor-Leste.

Tuir pedidu Aviaun Batik Air ba Autoridade Aviasaun Sivíl Timor-Leste (AACTL, sigla portugés), aviaun ne’e hakarak halo operasaun husi Dili ba Denpasar no Denpasar ba Dili.

“Foin daudaun, na’in ba iha empreza Batik Air mai hasoru ha’u hodi dehan katak sira garante folin billete sei tun maka’as no sei la oferese folin hanesan operadór aériu seluk ne’ebé maka hasa’e folin maka’as tebes”, dehan Florêncio Sanches ba Agência Tatoli iha ninia knaar fatin, Palm Bussiness, Hudi-Laran, sesta ne’e.

Notísia Relevante: SERVE Simu Ona Dokumentu Husi Batik Air, Maibé Presiza Hadi’a Buat Balun

Maski nune’e, nia realsa liután katak parte SERVE apresia tebes ba inisiativa Batik Air, tanba bele ajuda ona Timor-Leste rezolve folin billete aviaun ne’ebé daudaun ne’e sai preokupasaun iha sosiedade sira.

Entretantu, aviaun ne’ebé daudaun ne’e halo operasaun husi Dili ba Denpasar no Denpasar ba Dili mak hanesan Citilink ho folin entre $210 to’o $230 ba dirasaun ida de’it (one way), no Sriwijaya no Nam Air ne’ebé oferese folin entre $180 to’o $210 one way.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here