Vise-Prezidente CCI-TL asuntu infraestrutura, João Fernandes Alves. Imajen Tatoli/Joanico de Araújo

DILI, 05 marsu 2020 (TATOLI) – Vise-Prezidente Kámara Komérsiu no Industria Timor-Leste (CCI-TL,sigla portugés) asuntu infraestrutura, João Fernandes Alves, haree kona-ba apreensaun Autoridade Aduaneira (AA)/Alfándega ba Manu-Futu hamutuk 124 husi Oé-Cusse iha Portu Dili, laiha lójika tanba Oé-Cusse nu’udar parte ida husi nasaun Timor-Leste.

“Ha’u lahatene iha lei atu halo apreensaun ba sasan ne’ebé mai husi Oé-Cusse, tanba rejiaun ne’e mós hola parte territóriu Timor-Leste. Ha’u haree laiha lójika atu bele implementa lei ida hanesan ne’e”, dehan João Alves ba Agência TATOLI Tatoli iha ninia knaar fatin, Akait, kinta ne’e.

Notísia Relevante: Apreensaun Manu-Futu, DJ AA: “Ami Hetan Informasaun Husi Intelijénsia”

Nune’e, nia konsidera apreensaun ne’e loloos labele akontese.

“Alfándega halo apreensaun ba Manu-Futu husi Oé-Cusse no to’o agora ha’u seidauk hanoin katak hanusa maka buat ne’e bele akontese, ne’e ha’u haree la justu”, nia dehan.

João Alves argumenta, tanba de’it laiha asesu ba transporte terrestre, entaun sira (komunidade) tenke liuhosi máritima maski husi fronteira mós komplikadu tanba Indonézia mós sei husu.

Nia subliña, loloos banhira parte Alfándega deskonfia bele halo kedas apreensaun iha Oé-Cusse no la presiza to’o mai Dili.

“Ita imajina de’it se Alfándega Oé-Cusse no Dili mak laiha koordenasaun servisu defísil tebes, maibé ha’u hanoin Alfándega ne’e atu haree servisu relasaun importasaun no esportasaun husi estranjeiru, la’ós halo fali servisu lokál. Ha’u kuandu rona buat ne’e hanesan notísia foun no tanba ida ne’e akontese de’it iha Timor-Leste.

João Alves konsidera individu hosi Alfándega rasik maka atu halo prátika hodi halo impedimentu ba negosiante kiik sira atu buka moris.

Alfándega halo apreensaun ba Manu-Futu hamutuk 124 husi Oé-Cusse iha loron 29 fevereiru iha Portu Dili, tanba deskonfia mai husi Indonézia.

Dadaun ne’e manu hirak ne’e, asegura hela iha Diresaun Nasionál Kuarentena no Bioseguransa, Aeroportu, Comoro no Diresaun Nasionál Veterinária Ministériu Agikultura no Peska, liuhosi Departementu Diagnóstiku Veterenária iha loron 4 fevereiru ne’e, hasai ona rezultadu teste ba amostra manu lokál husi Oé-Cusse, Passabe.

Amostra ne’e rasik rekolla hamutuk 25 epidemilojia ho métodu selesaun random no halo ona ezaminasaun ba moras Avian Influenza Virus (AIV) iha unidade serelojia (teste diagnóstika) katak husi totál amostra hamutuk 25 ne’e ho rezultadu negative ka lahetan moras AIV.

Jornalista: Antónia Gusmão

Editora: Julia Chatarina

1 KOMENTÁRIU

  1. Hare notisia ne’e triste tebes, komunidade atu faan nia produtu mos halo at hanesan ne’e. Alfandega presija hatene NASIONAL no INTERNATIONAL, para hodi hatene no foti asaun, lae ita sente triste no ema estranjeiru hamnasa fali ita.

HAKEREK NO HATÁN

Please enter your comment!
Please enter your name here