Komandante Jerál PNTL, Komísariu Faustino da Costa. Imajen/ Egas Cristovao

DILI, 05 marsu 2020 (TATOLI)–Komandante Jerál Polisia Nasionál Timor-Leste (PNTL), Faustino da Costa, husu inan ho aman sira atu asegura oan sira ho kapasete bainhira halo viajen ho motór.

“Buat ne’ebé ita ignora tiha maka haluha atu asegura ita-nia aan. Ida famozu tebe-tebes maka inan ho aman la’o uza kapasete maibé oan la uza kapasete. Asegura liu sira-nia aan kompara ho sira-nia oan. Sira ne’e hotu mak kontribui ba asidente. Loloos ne’e oan sira mak importante liu,” dehan Komandante Jerál Polisia Nasionál Timor-Leste (PNTL), Faustino da Costa, ba jornalista sira hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidensiál Bairru-Pité, Dili.

Komandante Jerál ne’e hateten, hahalok ida ne’e mosu tanba, ema sempre mai ho hanoin ida katak, bainhira la tau kapasete no monu mós la’ós Polisia mak sei simu konsekuénsia.

Nia hatutan, situasaun ida ne’e mak nia aprezenta ba Xefe estadu durante enkontru semanál no aprezenta mós  dadus asidente sira ne’ebé akontese iha fevereiru 2020 ba PR hamutuk 345.

“Fatór prinsipál ne’ebé kontribui ba númeru ne’e maka fatór umana. La’o ho karreta no motór lahó karta kondusaun, la iha kondisaun, dala barak halai karreta la haree kondisaun karreta no motór kondisaun di’ak ka lae mós hakarak uza nafatin, depois ignoránsia de seguransa pesoál,” Faustino subliña.

Maski nune’e, Faustino relata nafatin ba Prezidente Repúblika katak PNTL kontinua halo sensibilizasaun liuhosi kanál sira espesialmente liuhosi mídia atu oinsa kontinua konsiénsializa nafatin puúbliku kona-ba seguransa da vida bainhira hala’o viajen.

Notísia Relevante: PNTL Rejista Asidente Tráfiku 42, Ema Na’in Rua Mate

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here