Primeiru-Ministru, Taur Matan Ruak. Imajen/ Egas Cristovao

DILI, 05 marsu 2020 (TATOLI)–Primeiru Ministru (PM), Taur Matan Ruak husu ba membru organizasaun Conselho Populár Defesa, República Democrática de Timor Leste (CPD-RDTL sigla Portugés) atu kumpri regra no leí ne’ebé iha to’o hetan solusaun ba disputa eis sede CPD-RDTL iha Balide, Dili.

“Ha’u hanoin ita iha regra no prosedimentu ne’ebé mak ita tenke tuir. Tanba ne’e, ha’u husu sira atu la’o tuir nafatin regra no alin sira husi organizasaun CPD-RDTL atu auguenta to’o hetan solusaun,” PM Taur fó sai apelu ne’e hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru-Pité, Dili.

Primeiru Ministru ne’e mós fiar katak, atu hetan solusaun ba problema ne’e tenke liuhosi prosesu legál.

“Ita tenke liuhosi Ministériu Justisa, Diresaun Terras no Propriedade, atu bele hetan mós fatin foun hodi tau fali postu foun. Buat sira hanesan ne’e, ita sei iha nível koordenasaun no ha’u espera katak iha tempu badak bele hetan solusaun,” Taur subliña.

Entretantu, Governu liuhosi Ministériu Justisa (MJ) entrega ona rai no eis sede CPD-RDTL iha Balide ba komandu Polisia Nasionál Timor Lorosa’e (PNTL) Munisípiu Dili, hodi utiliza nu’udár eskuadra Polísia postu Na’in Feto dezde tinan 2015.

Antes ne’e, Komandante PNTL munisípiu Dili, Superintendente Xefe Armando Monteiro, klarifika ona ba grupu Uniaun Juventude Maubere (UNIJMA) katak PNTL okupa rai ne’e bazeia ba desizaun Governu.

Notísia Relevante: Governu Sei La Entrega Eis Sede CPD-RDTL Ba UNIJMA

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here