Vise-Ministra Finansa, Sara Lobo Brites. Imajen Tatoli/António Gonçalves

DILI, 04 marsu 2020 (TATOLI) – Ministra Finansa ein ezersísiu, Sara Lobo Brites, husu ba ministériu sira atu servisu maka’as hodi jere Dotasaun Orsamentu Temporária (DOT) ho di’ak antes Ministériu Finansa (MF) taka sistema.

“Kona-ba saláriu funsionáriu nian ne’ebé tama tarde, ha’u hakarak dehan hosi Ministériu Finansa nia parte ami atribui DOT bazeia ba 2019 ka ninia sasukat ne’e Orsamentu Jéral Estadu 2019. Entaun kategoria sira ne’ebé hanesan saláriu no vensimentu liuliu sira ne’ebé selu mensál ne’e kobre ona nesesidade kada instituisaun bazeia ba sira nia orsamentu”, informa Sara Lobo Brites iha Palásiu Governu, kuarta ne’e.

Nune’e, kona-ba saláriu funsionáriu ne’ebé tama tarde, atuál Vise-Ministra Finansa ne’e dehan, distribuisaun DOT ba ministériu ida-idak iha ona no ministériu sira maka tenke hatene jere sira ninia orsamentu tanba DOT ne’e aplika ba fulan ida de’it. Entaun fulan nia rohan tenke taka, ne’e katak ministériu sira servisu tenke esforsa-an liután, tanba servisu ne’e ninia velosidade la normál hanesan orsamentu baibain no tenke sukat tempu.

“Ezemplu iha fulan-fevereiru ne’e loron menus liután, entaun ministériu sira tenke haka’as-an nune’e molok atu taka bele selu hotu ema nia saláriu”, nia subliña.

Antes ne’e, Governu liuhosi reuniaun Konsellu Ministru (KM) aprova DOT ba fulan-fevereiru 2020 ho montante $116.449.057.

Montante totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953, nune’e ninian totál hamutuk $116.449,057.

Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigór.

DOT ba janeiru 2020 ho valór millaun $116.4, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here