DILI, 05 marsu 2020 (TATOLI) – Diretór Investigativu Jeolojia, Insitutu Petroléu no Jeolojia (IPG-sigla portugés), Elias da Silva Cabral, informa laboratóriu Newark Delaware Estadu Unidu Amérika (EUA) hahú analiza ona amostra peskiza ho Amplified Geochemical Imaging (AGI) hamutuk 185.
“Ita nia amostra módulu AGI hamutuk 185, hahú análiza iha laboratóriu Newark Estadu Unidu Amérika”, informa Diretór Elias Cabral ba Agência TATOLI iha ninia knaar fatin, Elemloi-Delta, kinta ne’e.
IPG rasik haruka ona amostra ne’e iha kuarta (12/02), liuhosi transportasaun aériu husi Bali, Indonézia no kontinua ba Singapura to’o iha Amérika iha kuarta (18/02).
“Hafoin amostra ba peskiza mina no gás iha munisípiu Baucau no Viqueque ne’e to’o hahú kedan analiza no sei remata iha fulan-abríl”, nia akresenta.
Jerente ne’e dehan, parte laboratóriu fó ona informasaun katak amostra ba peskiza ne’e to’o ho susesu no kompletu
Kona-ba kustu atu halo análiza, Diretór Elias realsa, sosa ekipamentu AGI no analiza Iha laboratóriu Newark Delaware USA hamutuk ho osan $260.000.
Tuir planu, laboratóriu ne’e sei finaliza iha fulan-abríl, nune’e iha fulan-maiu bele halo prosesamentu dadus, hafoin juñu bele ona haree rezultadu ba peskiza mina no gás.
Jerente ne’e dehan, peskiza ne’e hetan rezultadu pozitivu, tanba ne’e ekipa IPG sei kontinua halo estudu kle’an ho métodu grau Jeofíziku atu hatene módulu mina ho kle’an inklui medida ba área ne’e.
Módulu AGI hahú kolleita iha loron 4 to’o 21 janeiru 2020, hanesan husi bloku A ne’ebé kompostu husi Postu Administrativu Venilale, Ossu-Viqueque, Vemasse ho totál módulu ne’ebé instala hamutuk 36.
Enkuantu bloku B kompostu husi Postu Administrativu Watulari, Quelicai, no Baucau, ekipa IPG instala módulu 73 no bloku C kompostu husi Laga no Baguia ho totál módulu 32.
Atividade seluk ne’ebé maka ekipa halo mak instalasaun módulu ba posu abandonadu-rua iha Alianbata ho módulu 22, posu Betano iha 22 ho kondisaun di’ak hotu.
Atividade peskiza ho ekipamentu AGI ho objetivu atu hatene ezisténsia idro-karbunetu iha rai okos, atividade kalibrasaun ba posu abandona no amostra mina no gás.
Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika gás no mina, liuhosi migrasaun microseepage, indika ho kímika analítika husi C2 to’o C20 iha fatuk rezervatóriu.
Jornalista: Florencio Miranda Ximenes
Editora: Julia Chatarina
