Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 05 marsu 2020 (TATOLI)—Prezidente Parlamentu Nasionál (PPN), Arão Noé de Jesus da Costa Amaral hateten, kompozisaun foun meza parlamentu nasionál depende ba desizaun politika hosi koligasaun foun.

Arão Noé afirma, ema polítiku preparadu ba situasaun saida de’it, importante prosesu tuir rejimentu no tuir regra tanba prezidente parlamentu ne’e titulár mak deputadu ne’e.

Tanba, nia dehan, kargu prezidente parlamentu ne’e deputadu sira maioria mak fó, to’o tempu ema dehan troka fali prezidente seluk ne’e prosesu normál no tuir dalan demokrásia.

“Ha’u agradese liu, se prosesu ne’e ida mós mak ha’u. Ha’u kontente liu tanba serbisu ne’e todan liu. Segunda to’o sesta, hahú hosi dadeer to’o lokraik, tenke prontu hela iha ne’e maibé  hanesan deputadu lae. Iha ajenda mak mai. sé laiha ajenda ba haree ha’u-nia to’os no haree ha’u-nia serbisu seluk. Ne’ebé, ha’u hanoin katak se ida-ne’e mak opsaun bankada koligasaun sira dehan katak tenke troka meza, ha’u prontu 100% ” dehan Prezidente Parlamentu Nasionál, Arão Noé de Jesus da Costa Amaral, ba Ajénsia TATOLI liuhosi entrevista iha resintu Parlamentu Nasionál.

Nia esplika, prosesu troka kompozisaun meza parlamentu bele mai hosi bankada seluk mak husu.

Prezidente Parlamentu Nasionál ne’e rekoñese situasaun troka kompozisaun meza parlamentu ne’e akontese tiha ona iha 2016. Iha momentu ne’eba, nia haktuir, bankada sira asina hodi troka prezidente Vicente Guterres no partidu CNRT mós asina.

Nia dehan, titulár mak deputadu katak nia tenke tinan-lima bainhira Eleisaun Antesipada ruma mak deputadu nia mandatu ramata.

“Tanba ne’e, ha’u nein sente manas, nein sente malirin ba asuntu (destituisaun) ne’e. Hanesan ema polítika prontu iha kualkér momentu katak atu troka ohin ka aban. Tanba, mandatu ne’e ita mai serbí de’it. Kargu ne’e ema seluk mak fó. Naran ida Arão ne’e mak inan-aman mak fó hahú hosi moris mai, ne’ebé ema sei la troka. Maibé buat ida kargu ne’e, ema mak fó no iha kualkér momentu bele retira,” nia hateten.

Prezidente Parlamentu Nasionál ne’e hateten, kargu sira hanesan prezidente parlamentu, prezidente komisaun sira, vise prezidente, sekretária meza ne’e hotu ne’e, depende ba konfiansa maioria iha parlamentu ka konfiansa maioria hosi bankada.

“Sé laiha ona konfiansa ema dehan ó para ona, fó fali ba ida ne’ebá, ne’e prosesu normal. Ne’e, demokrasia mak ne’e,”  nia hateten.

Notísia Relevante: Posibilidade, Kompozisaun Meza PN Atuál Sei Troka

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here