Vise-Prezidente CCI-TL asuntu infraestrutura, João Fernandes Alves. Imajen Tatoli/Joanico de Araújo

DILI 05 marsu 2020 (TATOLI) – Vise-Prezidente Kámara Komérsiu no Industria Timor-Leste (CCI-TL,sigla portugés) asuntu infraestrutura, João Fernandes Alves, konsidera impase polítika rai-laran fó impaktu negativu ba setór privadu sira tanba empreza barak maka taka sira ninia empreza.

Tuir Vise-Prezidente CCI-TL, katak tuir dadus ne’ebé iha katak empreza hamutuk 80 maka taka ona sira nia empreza tanba problema finanseira.

“Impase polítika ne’e fó impaktu negativu barak iha empreza ne’ebé maka nia atividade totál hamutuk 80 no iha empreza balun ne’ebé atividade ne’e la’o maibé hapara de’it nia traballadór, no empreza internasionál mós iha hitu maka taka sira ninia atividade”, tenik João Alves ba Agência TATOLI iha ninia knaar fatin, Akait, kinta ne’e.

Maske nune’e, CCI-TL seidauk hatene loloos dezempregu hira maka aumenta, maibé nia parte husu atu situasaun ne’e labele akontese nafatin tanba Governu mai halo kompromisu atu kria postu servisu.

“Tanba ne’e ami hosi Kámara Komérsiu eziji nafatin Governu hodi halo planu di’ak ida, oinsá maka kria postu servisu, la’ós katak empreza sira simu de’it traballadór maibé la rezolve situasaun. Ami nia hanoin maka oinsá hamutuk ho Governu atu halo planu ida ba família hotu iha ninia negósiu rasik, nune’e kuandu família ida iha nia negósiu rasik automatikamente dezempregu nia redús”, dehan João Alves.

Responsável ne’e fó ezemplu katak Governu ho setór privadu konsege loke ona negósiu to’o 60, automatikamente uma-kain 60 mak iha ona kampu servisu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here