Sekretáriu Estadu Terras no Propriedades (SETP), Mário Ximenes. Imajen Tatoli/ António Goncalves.

DILI, 05 marsu 2020 (TATOLI) —Rai no eis sede CPD-RDTL, Balidi, Dili, ne’ebé tama iha disputa entre Polisia Nasional Timor-Leste (PNTL) ho grupu Uniaun Nasionál Juventude Maubere (UNIJMA) sai ona hanesan domíniu públiku tanba ne’e tuir Lei katak Estadu liuhosi Ministériu Justisa (MJ) mak administra.

Notísia Relevante : PNTL Seidauk Bele Entrega Eis Sede CPD-RDTL ba UNIJMA

Lia hirak ne’e hato’o hosi  Sekretáriu Estadu Terras no Propriedade (SETP), Mário Ximenes, ohin, hodi responde ba disputa rai no proprietáriu eis sede CPD-RDTL entre PNTL ho UNIJMA.

Nia klarifika katak, bens movies sira ne’ebé sai nu’udar bens movies domíniu públiku, Estadu  mak administra liuhosi Ministériu Justisa tuir termu lei númeru 1/2003 no lei númeru 13/2017.

“Ba konsesaun uzu propriedade Estadu, ne’ebé Estadu liuhosi SETP iha tinan 2014 atribui ona ba komandu PNTL Eskuadra Nain Feto, Dili, agora daudaun utiliza hodi hala’o atividade iha termu konkordánsia entre Ministériu Justisa ho PNTL,” informa Sekretáriu Estadu Mário Ximenes, ba  Ajénsia Tatoli iha nia servisu  fatin, Dili.

Nia dehan, desizaun hosi Tribunál iha loron 21 fevereiru 2020 kona-ba prosesu kriminál ne’ebé mak Tribunál instaura kontra CDP-RDTL sira no tuir nia, desizaun Tribunál nian ne’e so absolve (bebaskan) de’it arguidu sira membru CPD-RDTL hosi akuzasaun krime hanesan; krime alterasaun estadu direitu, krime asosiasaun kriminoza no krime abuzu sinais. Maibé, Tribunál la deside katak propriedade estatutu rai ne’ebé maka Estadu liuhosi Ministériu Justisa konsede ba PNTL ne’e pertense ba grupu CPD-RDTL.

Tuir nia haree, desizaun Tribunál nian mós fó prazu loron 60 ba CPD-RDTL ba sasán hirak ne’ebé PNTL sira halo buska no apreensaun antes ne’e iha eis sede CPD-RDTL, maka kabe ba CPD-RDTL atu komprova hikas ba Tribunál iha prazu loron ne’ebé termina. Maibé, prosesu ida ne’e kompeténsia advogadu CPD-RDTL nian maka rekorre ba Tribunál, la’ós parte Estadu hanesan Ministériu Justisa ka PNTL nian.

Mário Ximenes dehan, nune’e rai refere kontinua atribui nafatin ba PNTL hodi hala’o atividade tuir termu uzu ne’ebé mak iha.

Nia afirma, governu liuhosi Ministériu Justisa  asegura de’it sasán Estadu nian, atu nune’e, uzu propriedade Estadu nian refere PNTL sira hala’o tuir termu no kondisaun ne’ebé iha hodi asegura seguransa ba iha komunidade tomak.

“Tan ne’e, laiha medida ida mak Estadu bele foti hodi atribui fali rai refere ba CPD-RDTL,” Sekretáriu Estadu Mário Ximenes afirma tan.

Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here