Espoza Prezidente Repúblika, Cidália Nobre Lopez Mouzinho Guterres entrega Apoiu ba Fundador Klinika Bairo-Pite, Daniel Murpy. Imajen/TATOLI: Felicidade Ximenes

DILI, 05 marsu 2020 (TATOLI)-Espoza Prezidente Repúblika, Cidália Nobre Lopez Mouzinho Guterres ho ekipa, kinta, ohin halo asaun karidade hodi apoiu orsamentu rihun ida resin dollar amerikanu no sasan hanesan supermi, rinsu, mina,sabaun, ba Klínika Bairo-Pité Dili hodi atende pasiente ho problema mánutrisaun.

“Iha Klínika Bairo-Pité ne’e mós iha mánutrisaun barak liliu ba kiik oan sira ne’ebé mak halo tratamentu iha ne’e,”informa Espoza PR hafoin entrega apoiu ne’e ba Fundadór Klnínika Bairo-Pité Daniel Murpy, iha Bairo-Pité Dili.

Tuir nia problema mánutrisaun la’os sofre de’it ba labarik kiik maibé ba mós ema adultu tanba laiha osan atu sosa hahan sufisiente ho nutrisaun aas.

Tanba ne’e, Cidália fiar katak ho apoiu ne’e sei responde nesesidade pasiente sira ne’ebé dadaun ne’e baixa iha Klínika Bairo-Pité atu sira-nia saúde rekopera lalais.

” Ba oin ami sei konsidera problema ida ne’e hodi tama iha prioridade gabinete ninian no la’os iha klínika ida ne’e de’it maibé ba mós fatin seluk,” tenik Cidália.

Iha fatin hanesan Jestór Klínika Bairo-Pité, Inacio dos Santos, hateten Klínika ne’e infrenta problema finanseira tanba ne’e maka hato’o proposta ba Gabinete Prezidente Repúblika hodi fó tulun.

“Aihan ne’ebé mak iha ami husu inan-aman nia kontribuisaun rasik ezemplu hanesan hahan ne’ebé mak iha nutrisaun hanesan F75 F100 ne’e la iha entaun ami hateten inan-aman para sosa rasik depois mai mak ami nia nutrisionista sira prepara mak fó ba kiik oan sira ne’ebé mak hetan máutrisaun ne’e hodi konsumu ida ne’e mak difikuldade ne’ebé mak ami hasoru,”esplika Jestór ne’e.

Dadaun ne’e klínika Bairo-Pité tenke fó baixa pasiente ho problema mánutrisaun kada loron to’o ema na’in tolu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here