Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 05 marsu 2020 (TATOLI) — Prezidente Autoridade Aviasaun Sivíl Timor-Leste                               (AACTL,sigla portugés), Ana Rosália Ximenes Varela, informa empreza Aviaun Citilink hatama ona pedidu iha Autoridade Aviasaun atu aumenta voo foun.

“Citilink hatama ona sira-nia pedidu mai iha AACTL, atu husu aumenta voo foun husi Dili ba Kupang no Dili ba Darwin, maibé ida-ne’e foin pedidu. Ami sei haree no tetu molok hasai flight approval”, dehan Ana Rosália ba Agência Tatoli iha ninia knaar fatin, Caicoli, kinta ne’e.

Nia realsa, parte AACTL sei tetu pedidu husi Citilink tanba iha kestaun balun importante kona-ba aviasaun-nian ne’ebé maka parte Citilink tenke kumpre atu hetan aprovasaun voo.

“Hanesan Autoridade, ami haree ba sira-nia prosesu molok ami asina pedidu, ida-ne’e tuir regra ne’ebé maka hakarek iha lei aviasaun sivíl”, nia akresenta.

Ana Rosália esplika liután, Aviaun Citilink daudaun ne’e halo hela operasaun ho dirasaun voo Dili ba Denpasar no Denpasar ba Dili, maibé agora tuir pedidu hakarak aumenta tan voo husi Dili ba Kupang nune’e mós husi Dili ba Darwin.

“Ami sei haree no tetu, tanba tuir teknikamante liuliu ba aviaun-nian, kondisaun aviaun ne’ebé maka durante ne’e halo operasasaun voo Dili-Denpasar no Denpasar-Dili maka kontinua halo operasaun voo ba Dili-Kupang no Dili-Dawin ka sira atu lori aviaun tipu seluk. Tanba ne’e ami sei haree didi’ak”, nia salienta.

Nia konsidera, ba kestaun aviaun presiza haree kondisaun sira ho rigór tanba ko’alia kona-ba aviaun ita tau importánsia maka ba vida ema-nian durante viajen.

“Tanba ne’e, ha’u nia Diretór tékniku sei avalia prosesu sira ho di’ak, nune’e bainhira sira dehan viável ona maka foin bele aprova pedidu ne’e. Entaun ha’u rasik nu’udar Prezidente AACTL sei asina pedidu ne’e hodi fó flight approval hodi autoriza aumenta voo, maibé kuandu prosesu análiza ba kestaun sira-ne’e ladún di’ak entaun ami seidauk bele fó lisensa tuir pedidu”, nia dehan tan.

Prezidente AACTL refere katak, entidade sira ne’ebé hakarak halo operasaun iha Timor-Leste presiza submete ba lei no prosedimentu ne’ebé estabelese ona no ba kestaun ne’e Autoridade Aviasaun sei la impede empreza aviaun sira ne’ebé hakarak halo operasaun iha Timor-Leste.

“Ami nu’udar Autoridade Aviasaun, sei la bandu empreza aviasaun sira ne’ebé interese hodi halo opersaaun iha Timor-Leste, maibé ami husu de’it ita hotu tenke la’o tuir regra, lei no prosedimentu sira iha AACTL. Tanba lei maka hakerek nune’e, ami mós tenke la’o tuir no maluk sira hotu tenke submete”, nia adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here