Ministra Finansa Ein-Ezersísiu atuál Vise-Ministra Finansa, Sara Lobo Brites. Imajen Tatoli/Egas Cristovão

DILI, 04 marsu 2020 (TATOLI) – Ministra Finansa ein ezesísiu, Sara Lobo Brites, informa daudaun ne’e saldo ba iha fulan-marsu naton hela atu sustenta mákina estadu, maibé iha fulan-abríl sei la sufisiente.

Tanba ne’e, nia dehan, iha tempu badak Ministériu Finansa (MF) sei aprezenta proposta ida ba Konsellu Ministru no husu autorizasaun ba Parlamantu Nasionál (PN) hodi foti osan iha Fundu Petrolíferu (FP), nune’e bele sustenta nafatin mákina estadu, maski daudaun ne’e Governu la’o hela ho rejime duodesimál.

“Ba-oin karik saldo iha fulan-abríl lato’o, konforme desizaun husi ita nia líder sira. Maibé daudaun ne’e ita nia saldo iha rotura no la to’o, tanba ne’e iha mekanizmu maka presiza aprezenta ba Konsellu Ministru no aprezenta mós Parlamentu Nasionál kuandu saldo la to’o”, dehan atuál Vise-Ministra MF, iha Palásiu Governu, kuarta ne’e.

Notísia Relevante: KM Aprova DOT Marsu 2020 ho Montante Millaun $116

Governante ne’e realsa, daudaun ne’e saldo ba fulan-marsu sei naton ho montante hamutuk millaun $215, maibé foti ona millaun $116 ba Dotasaun Orsamentu Temporáriu (DOT) fulan-marsu.

Entretantu, Governu liuhosi reuniaun Konsellu Ministru (KM) iha kuarta ne’e aprova DOT ba fulan-marsu 2020 hamutuk ho montante $116.449,057, ne’ebé despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390.953, nune’e korresponde totál $116.449,057.

DOT ba janeiru 2020 ho valór millaun $116.4, ne’ebé fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Enkuantu, DOT ba fevereiru 2020 ho montante $116.449.057, kompostu husi kategoria haat hanesan saláriu no vensimentu $17.852.067, bens no serbisu $38.614.980, transferénsia públika $26.591.048, no kapitál dezenvolvimentu $33.390.953, nune’e ninian totál $116.449.057.

Jornalista: Antónia Gusmão

Editora: Julia Chatarina

1 KOMENTÁRIU

  1. Muito obrigado ba Ministra Finansas em exercicio nb relata uza oje ba publiku bele asesu, parabens ba servisu diak, obrigado

HAKEREK NO HATÁN

Please enter your comment!
Please enter your name here