Xefe Bankada CNRT, Duarte Nunes. Imajen Tatoli/Egas Cristóvão

DILI, 04 marsu 2020 (TATOLI)—Xefe Bankada Parlamentár Partidu Congresso Nacional de Reconstrução de Timor (CNRT), Duarte Nunes hateten, Prezidente Repúblika, Francisco Guterres ‘Lú Olo’ simu (aseita) karta demisaun Primeiru-Ministru (PM), Taur Matan Ruak hafoin viabiliza formasaun Governu foun.

“Agora tempu ona Prezidente Repúblika simu ka la simu (karta demisaun hosi PM), kuandu nia simu mak viabiliza formasaun Governu. Se la simu entaun kontráriu. Ne’ebé, ita hein de’it desizaun Prezidente Repúblika,” nia dehan ba jornalista sira iha resintu Parlamentu Nasionál, kuarta ne’e.

Xefe Bankada CNRT ne’e hateten, Xefe Estadu simu karta demisaun iha semana hirak liubá maibé oras ne’e seidauk foti desizaun ba karta demisaun ne’e.

“Ita haree Primeiru-Ministru atuál hato’o ona nia pedidu demisaun. Signifika, viabiliza ona formasaun Governu foun maibé Prezidente mak deside simu ka la simu. Ita hatene katak laiha partidu ida mak maoria maibé agora koligasaun iha ona no iha prosesu tuir nia dalan atu forma Governu,” nia esplika.

Maski nune’e, nia tenik, buat hotu kompeténsia Prezidente Repúblika, Francisco Guterres ‘Lú Olo’ nian.

Hatán kona-ba pregunta bainhira mak Prezidente Repúblika la simu ka la aseita karta demisaun ninia implikasaun ba formasaun governu foun, Duarte Nunes hatán, hein de’it desizaun Prezidente.

Notísia Relevante: Iha Semana Ne’e, Xanana Sei Lidera Koligasaun Foun Hasoru PR Lú Olo

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here