Nee mak droga kokaina kilograma rua ne'ebé PNTL halo destroisaun iha Tibar . Imajen/Antonio Goncalves

DILI, 04 marsu 2020 (TATOLI) – Prokuradóra Lidia Soares, ne’ebé reprezenta Ministériu Públiku  (MP) solisita ba Tribunal Distritál Dili (TDD) atu aplika pena prizaun ba sidadaun Indonéziu (WNI/Warga Negara Indonesia) na’in rua ho inisiál SLP ho YK ne’ebé sai arguidu ba pratika krime droga.

Notísia Relevante : Tribunál Atambua Fó Sentensa Pena Prizaun Tinan 10 Ba José Soares no Tinan Lima Ba Angela Soares

Liuhosi audiénsia julgamentu, ohin, iha TDD ne’ebé prezide hosi juiz koletivu, Sribuana da Costa, Albertina Neves ho Antonio do Carmo, Prokuradóra Lidia Soares, iha ninia alegasaun final, solisita ba TDD atu aplika pena úniku tinan lima (5)  ba arguidu SLP ho arguidu YK ho pena tinan haat (4) tanba prátika krime tráfiku droga iha artigu 60 númeru 2,4,5 artigu 61 númeru 1 alínea C  no 62 lei númeru 5/1997 kona-ba Psychotropic, aplika ho forsa dispostu iha artigu 165 CRTL 2 artigu númeru 1,2 no 3 alínea  C lei 10/2003 agostu.

Arguidu sira mós pratika krime dezobediénsia iha artigu 244 númeru 2 kódigu Penal Timor-Leste tanba durante prosesu judisiál hafoin primeiru interrogatóriu arguidu la kolabora ho justisa. Nune’e, arguidu YK MP akuza ho krime tráfiku droga iha artigu 60 númeru 2,4,5 artigu 61 númeru 1 alínea C  no 62 lei númeru 5/1997 kona-ba Psychotropic aplika ho forsa dispostu iha artigu 165 CRTL 2 artigu númeru 1,2 n 3 alínea  C lei 10/2003 agostu.

Prokuradóra Lidia Soares hateten, tuir faktu ne’ebé arrola hosi MP iha indísiu forte hanesan material ne’ebé utiliza hodi tetu droga hanesan dasi no seringa ho sedotan.

Nia dehan, tuir testemuña iha julgamentu sira liu ba katak, akuzadu sira konsume droga no fa’an mós maske iha prosesu julgamentu primeiru interrogatóriu arguidu sira nia deklarasaun katak, sira so konsumu de’it iha 2013 nunka fa’an no tuir arguidu SLP nia parte so halo distribuidór de’it ba droga.

Rona tiha alegasaun MP nian, defeza Fernando Guterres ne’ebé fó asisténsia legal ba arguidu hatete, arguidu YK hanesan traballadór ida ne’ebé mak arguidu SLP bolu nia atu ba servisu iha ninia loja, tanba ne’e kona-ba distribuisaun droga nia parte la hatene.

“Arguidu YK durante ne’e sempre kolabora ho parte judisiáriu no iha julgamentu sira liu-ba nia parte sempre konfesa faktu sira ho onestu, tanba ne’e husu ba tribunal atu absolve tiha YK no arguidu SLP presiza tetu didi’ak,” hateten Fernando Guterres.

Arguidu YK arrepende  ho kazu ne’ebé nia hasoru tanba iha nia moris durante ne’e seidauk hasoru kazu sira ne’e. Nune’e mós Sasin J hanesan membru polísia dehan, momentu ne’ebá sira hala’o inspesaun ba duni hetan sasán droga sira ne’e, maibé sasán sira ne’e arguidu SLP mak hanesan distribuidór ba la’ós arguido YK.

Nia mós informa, bainhira halo apreensaun ba droga hirak ne’e no momentu ne’ebá kedas identifika arguidu YK mós konsumu hela droga tanba ne’e liuhosi identifikasaun teste urine iha polísia nian hatudu rezultadu pozitivu konsumu droga.

Rona tiha deklarasaun hosi parte rua, Tribunal  deside adia fila fali julgamentu ba loron 25 marsu 2020, tuku 17:00 lokraik.

Tuir depoimentu MP nian katak, iha loron 12 agostu 2013, tuku 16:30 Otl, iha Vila Verde, Dili, arguidu sira hala’o hela negosiasaun droga ho nune’e bainhira Polísia Nasional Servisu Investigasaun Kriminál (PNSIK) liuhosi pasa revista hetan duni droga ho tipu sabu-sabu hamutuk kilograma 0,32 no halo mós apreensaun ba objetu hanesan seringa, sedotan, dasin.

Iha tinan 2013, arguidu nain rua tuir prosesu julgamentu primeiru interrogatóriu iha Tribunál Distritál Dili aplika termu identidade rezidénsia (TIR) ba arguidu SLP no YK aprezentasaun periódiku.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here