Xefe Bankada FRETILIN, Francisco Miranda Branco. Imajen Tatoli/Egas Cristovão

DILI, 4 marsu 2020 (TATOLI)—Vise-Xefe Bankada Parlamentár FRETILIN, Francisco Miranda Branco hateten, molok deside demisaun Primeiru-Ministru, Taur Matan Ruak, koligasaun foun ne’ebé lidera hosi CNRT tenke fó garantia ba Prezidente Repúblika, Francisco Guterres “Lú Olo”.

“Pedidu demisaun hato’o ona ba Prezidente Repúblika, agora ita hein desizaun. Mais tuir loloos ne’e koligasaun tenke fó garantia ida ba Prezidente Repúblika atu hasai desizaun ba demisaun, se lae sei hamosu vakum iha governasaun ida. Sira tenke garante ho lista kompletu, indijita Primeiru-Ministru, atu nune’e bele fó garantia,” dehan nia ba jornalista sira iha Parlamentu Nasionál, kuarta ne’e.

Vise-Xefe Bankada Parlamentár FRETILIN ne’e afirma, se Prezidente Repúblika hasai uluk desizaun ba pedidu ne’e demisaun bele hamsou vakum boot liután.

“Loloos mak ne’e sira tenke garante atu-bele prezidente hasai desizaun no prosesu bele la’o dala ida-de’it para estadu labele vakum iha governasaun,” katak nia.

Nia dehan, laiha lei ida mak hatete PR tenke dekreta demisaun Primeiru-Ministru maibé Konstituisaun artigu 112 ko’alia de’it kona-ba pedidu demisaun.

Hatán ba preokupasaun ne’e, Xefe Bankada Parlamentár CNRT, Deputadu Duarte Nunes, hateten koligasaun ne’e preparadu no fiar sei hakotu impase polítika.

“Ami fiar katak koligasaun ne’e preparadu mak atu ba hasoru Prezidente Repúblika ne’e. Ami mós fiar mak forma koligasaun no la’o bá-oin,” nia dehan.

Notísia Relevante: Xanana Gusmão Sei Aprezenta Ezisténsia Koligasaun Foun Ba PR Lú Olo

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here