Ministru Ensinu Superiór, Siénsia no Kultura, Longuinhos dos Santos. Imajen/Egas Cristovao

DILI,  04 marsu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, hateten sei taka prosesu aprendijazen klase paralelu,  Institutu Ensinu Superiór balun iha Munisípiu sira tanba la prienxe kritéria no padraun ne’ebé estabelese ona.

“Ita -nia ekipa halo hela observasaun ba atividade klase paralelu sira iha Munisípiu desde tinan kotuk to’o ohin loron hodi avalia progresu saida mak sira atinji ona, maibé kuandu laiha ita sei taka,” katak, MESSK ba Jornalista sira iha Palasiu Governu Dili, ohin.

Dadaun ne’e, ekipa avaliasaun fó ona relatóriu provizóriu ba Governu nota klase paralelu balun la prienxe padraun liliu fasilidade no rekursu umanu tanba ne’e maka governu sei foti desizaun hafoin konklui relatóriu avaliasaun.

“Ita fó ona tempu tinan ida ba Instituisaun hanesan UNPAZ, Institutu Superiór Cristál  ne’ebé loke sira-nia klase paralelu atu garante kualidade klase sira ne’e. maibé kondisaun klase laiha mudansa desizaun ikus ita sei taka,”tenik tan.

Tuir Governante  katak IES ida hakarak loke ninia klase paralelu iha munisípiu tenke kompleta ekipamentu  no rekursu umanu sufisiente tuir kursu ida-idak hodi garante kualidade iha prosesu aprendijazen.

Funsaun ekipa avaliadór sira maka atu akompaña hodi haree progresu klase paralelu nian iha munisípiu.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here