Majór Jenerál Lere Anan Timur. Imajen Tatoli/António Gonçalves

DILI, 04 marsu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur hateten, maske instituisaun F-FDTL kontinua enfrenta difikuldade kona-ba viatura maibe situasaun ne’e la hamate espíritu atu kontinua serbí povu.

Lere Anan Timur hato’o asuntu ne’e, hafoin enkontru semanál ho Prezidente Repúblika (PR), Francisco Guterres “Lú Olo”, iha palásiu Prezidensiál Bairrupité, Dili.

“Enkontru regulár ohin ne’e, atu informa kona-ba situasaun rai laran no informa mós kona-ba situasaun forsa armada ninian. Liuliu kona-ba atividade, kondisaun no difikuldade sira,” Lere hateten ba mídia.

Kona-ba difikuldade, Lere hatutan, ho impase politika ida ne’e, F-FDTL iha problema barak tanba estadu moris de’it ho orsamentu duadésimu ne’ebé labele rezolve nesesidade instituisaun estadu nian.

“Ho ida ne’e, ami iha problema kona-ba viatura, transporte no lojístika. Tanba, karreta sira ne’ebé ami uza ne’e, karreta Sira ne’ebé mak malae sira fó iha tinan 2003. Karreta sira ne’e uza atu tula forsa sira perigu. Maibé, pasiénsia, tanba kestaun nesesidade no iha tinan hirak ba kotuk ita ko’alia kona-ba manutensaun. Maibé, karreta ne’e ita kompara ho ita ema katak bainhira ita-nia idade avansa ona, ita bele manutensaun halo oinsa mós bainhira tinan to’o ona 80 ne’e, sae rai lolon mós problema boot,” nia dehan.

Maski ho kondisaun hanesan ne’e, maibe líder másimu forsa armada ne’e ho fiar aan katak sei esforsu hodi buka forma ida oinsá mak kontinua serbi povu, ida ne’e mak importante.

Jornalista : Cipriano Colo

Editor      : Cancio Ximenes

HAKEREK NO HATÁN

Please enter your comment!
Please enter your name here