Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (04/03). Imajen TATOLI/Egas Cristovão

DILI, 04 marsu 2020 (TATOLI) – Governu liuhosi sorumutu Konsellu Ministru (KM), atribui podér tomak ba Ministru Administrasaun Estatál ein ezersísiu, Abílio José Caetano, hodi asina akordu entre Ajénsia Kooperasaun Internasionál Koreia (KOICA-Korea International Cooperation Agency) ba Programa Nasaun Unida ba Dezenvolvimentu (PNUD).

“Ministru Administrasaun Estatál ein ezersísiu, simu plenu podér hosi Konsellu Ministru atu halo asinatura ba Memorandu Entendimentu KOICA ba Programa Nasaun Unida ba Dezenvolvimentu hamutuk ho Governu Repúblika Indonézia”, informa Ministru Reforma Lejislativa no Asuntu Parlamentár, Fidelis Manuel Leite Magalhães hafoin reuniaun KM iha Palásiu Governu, kuarta ne’e.

Governante ne’e afirma, kooperasaun institusionál ne’ebé prevee iha entendimentu ne’e, sei permite atu hadi’ak kondisaun hodi populasaun sira iha área remota iha munisípiu sira hanesan Baucau, Bobonaro, Dili no Manantutu atu hetan asesu ba eletrisidade no bee moos.

PNUD hanesan parseiru importante Governu, ne’ebé sempre apoiu polítika Governu no daudaun ne’e apoiu hela Governu hodi haree asuntu iha setór judisiál, liuliu Reforma Judisiál no Reforma lejizlativa.

Antes ne’e, Governu Timor-Leste halo ona kooperasaun ho KOICA iha área oinoin hanesan iha edukasaun ne’ebé hadia eskola, formasaun ba funsionáriu ministériu sira, no seluk tan.

Kooperasaun KOICA ho Governu Timo-Leste ikus liu mak suporta polítika Governu kona-ba zero plástiku no redús lixu iha sidade Dili.

Ba projetu zero plástiku investe hamutuk orsamentu  millaun $3, kompostu husi HEINEKEN no CALTEC investe hamutuk millaun $1,5 no KOICA millaun $1,5.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here