Xefe Estadu Maiór Jenerál F-FDTL, Majór Jenerál Lere Anan Timur. Imajen/Eugénio Pereira

DILI, 04 marsu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur hateten, kualkér partidu polítiku bele forma koligasaun foun atu forma Governu maibé tenke Governu ida ne’ebé forte no estavel hodi rezolve povu nia problema nomós  instituisaun estadu nia problema.

“Ba ha’u, se de’it mak atu forma koligasaun foun hodi forma Governu foun, naran katak tenke garante Governu ida ne’ebé estável, metin to’o 2023, atu ita evita eleisaun antesipada. Tenke Governu ida ne’ebé forte atu rezolve ita-nia problema povu nian, problema instituisaun estadu nian, liuliu problema hanesan ami nian. Hanesan oras ne’e daudaun instituisaun F-FDTL karreta la iha. Karreta sira ne’ebé agora uza ne’e mesak karreta la di’ak. Ami infraestrutura la to’o. Tanba ne’e mak rekrutamentu en vez de tau 600, tenke fahe ba faze rua tanba infraestrutura, viatura no buat hotu la to’o,” Lere hato’o lía hirak ne’e, hafoin enkontru semanál ho Prezidente Repúblika Francisco Guterres Lu Olo, iha palásiu Prezidensiál Bairru-Pité, Dili.

Lere mós mensiona katak, iha mós problema barak ne’ebé veteranu sira enfrenta, Nia dehan tan, sorte veteranu sira aseita ona hodi kria sira nia fundu rasik atu garante ba futuru oan sira nian.

“Ami-nia kontribuisaun ami la sente ida, tanba osan ne’e ko’a kedan iha banku, tanba ne’e ami la sente. Maibé, ami iha garantía, ho ida ne’e mak ha’u hanoin katak Governu ne’e tenke metin no labele frazil hodi rezolve kestaun sira ohin ne’e. Tanba ita haree ba ne’e, eleisaun antesipada mós ladún favoravel. Estabilidade governamentál mak importante liu,” Lere subliña.

Entretantu, koligasaun foun iha ona, liuhuoi asina akta iha Sábadu 22 fevereiru, reprezenta husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein Ezersísiu UDT, Rudolfo Aprarício Guterres, Prezidente Interinu FM, Egídio de Jesus, no Prezidente PUDD, António de Sá Benevides.

Koligasaun ne’e rasik hato’o ona pedidu audiénsia ho Prezidente Repúblika, ne’ebé tuir planu, Sei realiza iha Sesta loron 6 Marsu tinan ne’e.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here