Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (04/03). Imajen TATOLI/Egas Cristovão

DILI, 04 marsu 2020 (TATOLI) – Governu liuhosi reuniaun Konsellu Ministru (KM) estraordinária iha kuarta ne’e, aprova Projetu Dekretu-Lei, ne’ebé aprezenta husi Ministra Saude ein ezersísiu, Elia António de Araujo dos Reis Amaral, kona-ba harii Servisu Nasionál Ambulánsia no Emerjénsia Médika, Institutu Públiku (I.P).

“Inisiativa ida ne’e, nu’udar aktu normativu atu buka atu hasa’e nível funsionamentu no hatán ba servisu médiku sira-nian atubele garante kuidadu urjénsia ne’ebé di’ak liu, ba servisu emerjénsia médika iha territóriu nasionál tomak, inklui transporte ba vítima sira ne’ebé hetan asidente ka vítima sira ne’ebé hetan moras derrepente, hodi lori lalais ba instituisaun sira ne’ebé presta kuidadu saúde apropriadu “, informa Ministru Reforma Lejislativa Asuntu Parlamentar, Fidelis Manuel Leite Magalhães liuhosi konferénsia imprensa iha Palásiu Governu, kuarta ne’e.

Governante ne’e subliña, Servisu Nasionál Ambulánsia no Emerjénsia Médika sei kria no bainhira hamriik nu’udar ema koletiva públika, liuhosi Institutu Públiku, ne’ebé ho autonomia administrativa, finanseira no patrimoniál, tutela no superintendénsia ba membru Governu responsável ba área saúde, hodi bele hatán lalais ho autonomia ba nesesidade koletiva populasaun nian.

Objetivu husi harii instituisaun ne’e, atu aumenta nível funsionamentu no hatán ba servisu médiku ho kualidade atu garante kuidadu ba emerjénsia médika iha territóriu nasionál tomak, inklui transporte husi sinistradu ka vítima moras.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here