DILI, 04 marsu 2020 (TATOLI)-Fundadór Liga Futeból Amadora (LFA), Miguel Manetelo husu ba Sekretáriu Estadu Juventude no Desportu, Federasaun Futeból Timor-Leste atu hamutuk ho dirijente LFA hodi buka solusaun ba polémika liliu desizaun atu submete LFA époka 2020 iha FFTL nia okos.

Nia informa enkontru entre FFTL ho Federation International Football Asosiation (FIFA) foin lalais iha Dili deskute ona atu submete atividade LFA nian ba FFTL.

Tuir Eis Governate ne’e katak durante mandatu Eis SEJD, Leovigildo Hornay, atividade  LFA submete iha SEJD nia okos,  maibé agora tenke submete fali  ba FFTL.

Notísia Relevante :FFTL Maka Sei Organiza LFA

“Agora hanesan timoroan ita-nia komunikasaun ba malu ne’e mak importante oinsá mak tuur hamutuk karik iha buat ruma laloos mak nune’e tenke buka solusaun,” katak Eis Sekretáriu Estadu Juventude no Desportu (SEJD) ba Jornalista sira iha edifísiu Ministériu Edukasaun Juventude no Desportu  Villa-Verde,ohin.

Nia hateten lei baze desportu artigu 23, alinea F hateten federasaun iha obrigasaun hodi apoiu finansiamentu ba atividade noun profesionál hanesan LFA nian, la’os FFTL maka atu organiza fali Liga Futeból Amadora.

“Bainhira FFTL atu organiza atividade ruma tenke profesionál hanesan alta kompetisaun, governu iha duni responsabilidade  atu tulun atividade sira non profesional ne’e hanesan LFA ho liga sira seluk ne’e, sé governu lá fó apoiu klube sira atu hetan osan hosi ne’ebé loloos ne’e sira tenke hetan osan hosi patrosinadór maibé tanba ita-nia kondisaun riil nune’e governu mak tenke apoiu duni,” esplika Manetelo.

Notísia Relevante :LFA Orgaun Independente

Nia observa katak klube barak sei laiha atividade bainhira governu husik ona ninia responsabilidade hodi fó apoiu finanseira hodi entrega fali responsabilidade ne’e ba FFTL.

“Tuir ha’u nia observasaun, bainhira LFA hahú ne’e ho inisiativa estadu nian mak la’o to’o ohin loron. Entaun ohin loron governu haree klube sira iha ona kondisaun  mak governu husik entaun di’ak, sé lae ita hamate ona dezenvolvimentu futeból, sé nune’e mak FFTL atu “ambil ali” liga ne’e entaun liga ne’e tenke ba ona profesionál,” nia hatutan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here