DILI, 4 marsu 2020 (TATOLI)—Xefe Bankada Parlamentár Partidu Congresso Nacional da Reconstrução de Timor (CNRT), Duarte Nunes konkorda ho opiniaun Sekretáriu Jerál Partidu FRETILIN, Marí Alkatiri, katak ohin loron partidu kiik sira mak sai fali determinante ba konfigurasaun polítika atuál.
“Ne’e idak-idak bele ko’alia. Se ita haree ba realidade parese que loos,” Xefe Bankada Parlamentár CNRT, Duarte Nunes, informa ba jornalista sira iha resintu Parlamentu Nasionál, kuarta ne’e.
Duarte Nunes ko’alia kestaun ne’e tanba antes ne’e, Sekretáriu Jerál Partidu FRETLIIN, Mari Alkatiri, observa katak ohin loron partidu kiik sira mak sai determinante fali ba kualkér konfigurasaun foun.
“Tanba ohin loron ó la absoluta, partidu kiik mak sai fali determinante,” Sekretáriu Jerál FRETILIN, Mari Alkatiri informa ba jornalista sira, hafoin partisipa iha selebrasaun loron nasionál veteran nian iha Palásiu Governu, tersa ne’e.
Hatán ba preokupasaun ne’e, Sekretáriu Jerál Partidu Demokrátiku (PD), António da Conçeição, afirma partidu kiik hatudu dalan de’it.
“Ami promove diálogu. Biar ami kiik hanesan loke de’it dalan maibé la’ós mós ami mak determina iha formasaun koligasaun ida-ne’e maibé vontade di’ak hosi CNRT ninian hosi Maun Boot Xanana ninian atu-bele repoin fila-fali normalidade ba situasaun no repoin fila-fali konfiansa ba populasaun tomak,” nia dehan,
Nia afirma, ho situasaun inserteza polítika ne’ebé mosu halo PD hamutuk ho CNRT halo koligasaun ida-ne’e ho intensaun atu fó resposta ba situasaun polítiku atuál.
Sekretáriu Jerál Partidu Demokrátiku ne’e argumenta dezde harii partidu tenke hola nafatin responsabilidade, atu-bele fó resposta ba vida nasaun no vida povu nian.
Notísia Relevante: Alkatiri: “Ohin Loron, Partidu Ki’ik Mak Sai Determinante”
Jornalista : Evaristo Soares Martins
Editór : Cancio Ximenes
