Veteranu Eurico Rosario.Imajen/Florencio Ximenes

DILI, 3 marsu 2020 (TATOLI)—Asistente Rejiaun Ponta Leste atuál membru Konsellu Kombante Libertasaun Nasionál Munisípiu Lautem (CCLN-sigla portugés), Eurico Rosário dos Santos “Iku Junik” hateten, loloos ne’e veteranu sira labele inklina ba partidu polítiku.

Veteranu ne’e konsidera, loron nasionál veteranu nian ne’e importante atu haree situasaun ba-oin tanba halo funu to’o 1999 maibé hafoin ukun aan boot sira maka haluha fali.

“Situasaun ne’e halo ami ami fahe-malu, idak-idak ba nia partidu. Ne’e konkista podér atu ba kaer podér no atu ezekuta podér maibé atu haree loron istóriku ida-ne’e defisil uituan tanba partidu. Loloos ne’e veteranu labele tama fali partidu. Se kuandu sira tama partidu ne’e fó forsa de’it ba ema seluk. Ema maka aproveita veteranu maibé veteranu sai nafatin vítima,” nia dehan ba Ajência TATOLI liuhusi entrevista iha Sentru Covensaun Dili (sigla portugés, CCD).

Nia afirma, situasaun ne’e halo konsege lori nia hasoru ona Primeiru-Ministru, Taur Matan Ruak, Komandante Em Xefe Xanana Gusmão, atu nune’e veteranu sira labele envolve-aan iha partidu polítku.

“Ha’u fó hatene ba sira (Xanana no Taur Matan Rauk) katak veteranu agora ema aproveita hodi sai riku. Veteranu sira sai ki’ak nafatin. Situasaun hirak ne’e mak kontribui halo kondisaun moris veteranu sira sai vítima nafatin,” nia dehan.

Notísia Relevante: Pensaun Vitalísia no Pensaun Veteranu Tenke Balansu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here