Veteranus Cornelio Gama L-7. Imajen/ Tatoli Egas Cristovao

DILI, 03 marsu 2020 (TATOLI)–Iha komemorasaun loron veteranu ba datoluk ne’ebé hala’o iha iha Palásiu Governu, ohin, Veteranu Cornélio Gama “L7” fó hanoin no husu ba jerasaun foun sira ne’ebé kaer ukun ne’e ukun nasaun ho loloos no di’ak

“Ko’alia kona-ba loron ohin ita relembra fali funu ne’ebé ami halo depois mudansa iha loron 3 Marsu 1981. Ohin loron, ita selebra ida-ne’e hanesan istória ida konta no fó hanoin ba ita-nia oan sira no ba futuru. Katak, uluk ami funu hasoru buat oin-oin mak ohin loron ita ukun rasik-an. Tanba ne’e, ha’u husu ba jerasaun foun sira ne’ebé ukun nasaun ne’e ho loloos no di’ak,” dehan L7 ba jornalista sira hafoin partisipa Komemorasaun Loron Nasionál Veteranu ba datoluk iha Praça de Proclamação da Independéncia, Palásiu Governu, Dili, ohin.

Veteranu “L7” hatutan, funu ne’ebé sira luta durante tinan 24 nia laran ne’ebe lori Timor-Leste ba hadau ukun rasik-an ona la’os buat fásil ida. Tanba ne’e, nia husu ba foinsa’e sira atu kaer metin nasaun ne’e ho didi’ak.

“Agora Timor ukun rasik-an ona. Hanesan hahán ida karik, ami entrega ba imi, jerasaun foun sira hodi kaer nasaun ida-ne’e, ukun ho di’ak no halo progresu ba dezenvolvimentu ho di’ak,” nia tenik.

Veteranu ne’e haktuir, agora nasaun foun sira hakarak loron FALINTIL nian halo mudansa atu labele selebra loron FALINTIL hanesan ho loron sira seluk hanesan 20 Agustu no 28 Novembru.

“Ami hakarak mudansa ida katak FALINTIL nia loron tinan ida-ne’e halo ba dala-39, ne’e FALINTIL hakarak halo mudansa, labele hanesan ho loron 20 Agustu ka 28 Novembru ida. Tanba FALINTIL husik família iha vila laran fó-an ba terus no mate iha ai-laran. Ami-nia hanoin mak mate ka moris ukun rasik-an,” nia hatutan.

Notísia Relevante: PR Husu ba Konsellu Veteranu atu Grava Lalais Kombatente Idak-idak Nia Istória

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here