Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR

DILI, 03 marsu 2020 (TATOLI)–Xefe Kaza Sivíl Prezidénsia Repúblika, Francisco María de Vasconcelos hateten, Prezidente Repúblika (PR), Francisco Guterres “L ú Olo”, hakarak hasoru-malu ho Koligasaun foun iha semana ne’e nia laran.

“Prezidente Repúblika hakarak iha semana ne’e nia laran, sira bele hasoru malu ho koligasaun foun sira,” Xefe Kaza Sivíl  Prezidénsia Repúblika, Francisco María de Vasconcelos, hato’o lia hirak-ne’e hafoin partisipa serimónia Komemorasaun Loron Nasionál Veteranu sira-nian iha Praça de Proclamação Independéncia, Palásiu Governu, Dili, ohin.

Kona-ba data, nia hateten, depois gabinete Prezidénsia Repúblika sei fó-sai maibé klaru katak sei akontese iha semana ne’e nia laran.

“Sira haruka karta, maibé hein Prezidente Repúblika responde, nune’e sira bele ba hasoru prezidente,” nia subliña.

Kona-ba konteúdu husi karta ne’e, Vasconcelos rejeita atu fó-sai maibé nia rasik rekoñese katak koligasaun foun aprezenta duni karta ba Xefe Estadu iha semana kotuk.

“Ha’u labele fó-sai konteúdu karta ba ita-boot sira. Maibé, klaru sira haruka duni karta ba iha Prezidente,” Xefe Kaza Sivíl salienta.

Entretantu, koligasaun foun eziste ona, liuhusi asina akta iha sábadu, 22 fevereiru, ne’ebé reprezenta husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein-ezersísiu UDT, Rodolfo Aparício Guterres, Prezidente Interinu Frenti-Mudança, Egídio de Jesus no Prezidente PUDD, António de Sá Benevides.

Notísia Relevante: Partidu Lima Hamutuk ho CNRT Asina Ona Akta Koligasaun Foun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here