Sekretáriu Estadu ba Igualdade no Inkluzaun, Maria José da Fonseca Monteiro de Jesus. Imajen: Antonio Goncalves

DILI, 03 marsu 2020 (TATOLI)–Sekretária Estadu Igualdade no Inkluzaun (SEII), Maria José Fonseca Monteiro de Jesus informa, iha selebrasaun loron veteranu ne’ebé monu iha 3 marsu ne’e importante tebes ba eroi no eroina sira.

Iha ámbitu loron veteranu, nia sente haksolok tanba Prezidente Repúblika mós mensiona balansu eroi no eroina sira-nia naran iha ninia deskursu.

“Ita hotu haksolok tanba ita-nia Prezidente Repúblika la’ós mensiona de’it ita-nia eroi sira maibé Prezidente mós temi ita-nia eroina sira hanesan saudoza Maria Tapó no Rosa Muki Bonaparte nia naran. Ne’e hatudu katak ita iha ona pasu ida bá-oin no esforsu atu asegura balansu jéneru no promosaun Igualdade no Inkluzaun,” Maria da Fonseca ba jornalista sira iha ámbitu Komemorasaun Loron Nasionál Veteranu sira-nian iha Praça de Proclamação da Independéncia, Palásiu Governu, Dili, ohin.

Rai Timor-Leste agora hamriik hanesan rai ida independente, tuir nia, kontribuisaun mai husi feto maluk sira hotu. Tanba ne’e, loron ida ohin ne’e importante atu kontinua komemora hodi fó hanoin nafatin ba jovén sira atu refleta.

Selebrasaun ne’e, nia hatutan, fó hanoin ba jerasaun foun sira ohin loron nian kona-ba istória pasadu nian ne’ebé eroi no eroina sira husik hela mai timoroan sira.

“Selebrasaun ne’e atu kontinua fó hanoin ba jerasaun foun sira ohin loron nian kona-ba istória pasadu nian ne’ebé ita-nia eroi no eroina sira husik hela mai ita. Ho sira-nia luta no dedikasaun mak ohin loron ita jerasaun foun sira bele goza ukun rasik-an ida-ne’e,” nia dehan.

Notísia Relevante: Xefe Estadu Fó Rekoñesimentu Espesiál Ba Xanana, Horta no Alkatiri

Jornalista : Osória Marques

Editór     :  Cancio Ximenes

HAKEREK NO HATÁN

Please enter your comment!
Please enter your name here