Sekretáriu Estadu ba Asuntu Kombatente Libertasaun Nasionál, Gil da Costa Monteiro 'Oan Soru'. Imajen António Gonçalves

DILI, 02 marsu 2020 (TATOLI)—Sekretáriu Estadu ba Asuntu Kombatente Libertasaun Nasionál (SEAKLN), Gil da Costa Monteiro “Oan Soru” informa, iha fulan janeiru 2020, husi Konsellu Veteranu hapara ema hamutuk na’in-19 ne’ebé falsifika dokumentu atu sai veteranu.

“Ita hatene katak ninia redusaun ne’e hahú tun ona. en-prinsípiu iha fulan janeiru ninia laran de’it, ita hapara ema verifika dokumentu atu sai veteranu hamutuk ema na’in-19. Agora, fevereiru 2020 ninian ne’e, ha’u seidauk deskobre tanba ohin foin loron 2 fulan marsu ne’e. Ha’u seidauk deskobre fulan fevereiru no marsu nian,” dehan Gil da Costa Monteiro ba jornalista sira iha Centro Covenção Dili (CCD), ohin.

Oan soru esplika, veteranu falsu ne’e laiha maibé iha ema mak falsifika dokumentu atu sai veteranu falsu ne’e mak iha. Se veteranu falsu ne’e iha, nia dehan, ohin veteranu mesak falsu hotu de’it.

“Bainbain ha’u ko’alia tiha ona katak veteranu falsu ne’e laiha. Maibé, ema mak falsifika dokumentu atu sai veteranu ne’e iha. Nia razaun falsifika dokumentu atubele hetan osan. Ema ne’ebé halo asaun ne’e hatene katak liuhosi dalan falsifika dokumentu ne’e la hisik kosar maibé bele hetan osan, maibé la fásil mós,” nia hateten.

Notísia Relevante: Lere Anan Timur: “Istória Laiha, Klamar Laiha!”

Nia haktuir, iha fulan janeiru tinan ne’e, husi pensaun mártir ne’ebé mate hamutuk na’in-15 no pensaun husi na’in rasik simu hamutuk ema na’in-25.

Entaun, nia dehan, ida ne’ebé falsifika dokumentu mosu mai ne’e, Konsellu Veteranu deteta tutuir hela, tanba ne’e halo hela nafatin persegisaun.

“Tanba ne’e, ha’u apela mós ba parte hotu-hotu atu kontribui ba prosesu hotu. Maibé, sé mak lakohi kontribui ne’e signifika katak nia mós promotór ba ema ne’ebé falsifika dokumentu ne’e,” nia apela.

Notísia Relevante: Oan Soru: “Konsellu Veteranu Hanesan Uma-Lisan Veteranu”

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here