Veteranu Cornelio Gama L-7. Imajen TATOLI/Antonio Goncalves.

Funu…
Iha funu laran
Soldadu sira tiru malu ho inimigu, Xanana mak orienta
Mate ba rai ida-ne’e, ema ida la orienta atu mate
Atu halibur eroi sira-nia restu mortál, Governu mak orienta
Agora, restu mortál ua’in mak seidauk haloot ho dignu
Kaisaun sira hahú dodok be dodok
Hein to’o bainhira…

DILI, 03 marsu 2020 (TATOLI)—Restu mortál hira daudaun ne’e sei hatuur iha ita-boot ninia rezidénsia? Eis Komandante Rejiaun III, Cornélio Gama “L7” hatán, mate-ruin ne’ebé rai iha ha’u-nia rezidénsia iha Postu Administrativu Laga, Munisípiu Baucau, hamutuk 448. Bainhira mak atu haloot? L7 haktuir sei hein orientasaun husi Komandu Luta, Xanana Gusmão.

“Kona-ba restu mortál (mate-ruin) ne’ebé rai iha ha’u-nia fatin, ami halo tuir nafatin Governu nia programa. Maibé, ami rai tanba ami hanoin povu no nasaun ida-ne’e. Ami la depende ba Estadu. Ami mós iha kbiit para hodi rai tanba ita haree ba orsamentu laiha,” dehan Veteranu “L7” ba jornalista sira hafoin partisipa Loron Nasionál Veteranu ba datoluk iha Praça de Proclamação da Independéncia, Palásiu Governu, Dili, ohin.

Kona-ba prosesu kontinuasaun, Veteranu “L7” haktuir, sei hein orientasaun husi líder sira hanesan Xanana Gusmão, Taur Matan Ruak, Francisco Guterres “Lú Olo” no Marí Alkatiri mak foin hala’o fali. Tanba nia hanesan soldadu de’it, ne’ebé labele halo buat ida.

“Ami labele halo buat ida enkuantu ita-nia líder istóriku hanesan Maun Boot Kay Rala Xanana Gusmão, Taur Matan Ruak, Francisco Guterres “Lú Olo” no Marí Alkatiri seidauk orienta,” nia esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here