DILI, 03 marsu 2020 (TATOLI)—Veterana Joaninha Marques “BIALAKA” sente kontente bainhira hetan fiar no konfiansa hodi partisipa iha komemorasaun loron nasionál veteranu nian ba datolu iha Palásiu Governu.

Iha komemorasaun refere, Veterana “Bialaka”, husu ba foinsa’e sira atu hatudu domin ba malu no husu ba foinsa’e sira atu bele kria dame iha iha rai-lulik Timor-Leste.

“Timor ukun-aan ona laiha tan funu hanesan ami hasoru durante iha ai-laran ne’eba. Ne’ebé, ha’u husu ba foinsa’e sira katak, ba oin hamutuk hatudu domin ba malu hodi kria dame iha rai doben ida ne’e nia leten, atu nune’e Timor moris iha dame nia laran,” dehan veterana Bialaka ba Ajnsia TATOLI hafoin partisipa komemorasaun loron nasionál veteran ba datolu iha Palásiu Governu, Dili.

Nia hatutan, luta ne’ebé sira halo durante tinan 24 nia laran ninia rezultadu mak ohin loron Timor-Leste bele hetan ninia indepedénsia.

“Loron veteranu ne’e, ami-nia loron. Tanba, ami feto no mane nia luta ne’ebé durante tinan 24 iha ai-laran ne’eba, hasoru terus no susar oin-oin. Balun mate no balun moris hodi bele sai sasin ba Timor-Leste nia independénsia,” nia haktuir.

Veterana ne’e hato’o mós ninia sentimentu kontente tanba maske nia feto maibé iha nia moris tomak nia nia mós oferese nia-aan hodi luta ba doben Timor-Leste nia ukun-rasik aan ne’e.

“Agora ha’u mai partisipa loron veteranu ida ne’e, ha’u senti kontente. Tanba, maske ha’u feto maibé ha’u oferese ha’u-nia aan luta ba rai doben Timor-Leste ida ne’e, ho hanoin ida de’it katak mate ka moris ukun rasik-aan. Ha’u-nia terus no susar ne’ebé iha ai-laran nia rezultadu mak ohin loron ita ukun-aan ne’e. Ida ne’e de’it, ha’u kontente ona,” nia dehan.

Iha ámbitu ukun rasik-aan nia laran ne’e, Veterana Bialaka mós apela ba foinsa’e timoroan sira liliu estudante sira atu estuda didi’ak hodi serbí rai lulik Timor-Leste, tanba Timor-Leste nia futuru iha jerasaun foun sira-nia liman.

“Ha’u nia esperansa mak agora ami ferik no katuas hotu ona. Ne’ebé, ba oin futuru la’os iha ami maibé futuru ba imi foinsa’e sira nian. Nune’e, aproveita tempu didi’ak hodi estuda para bele serbí rai ida ne’e ba oin,” nia salienta.

Veterana ne’e mós husu ba lidér istóriku sira hamutuk nafatin ho veteranu no veterana sira atu hapara ba ema balu ne’ebé insulta lidér sira iha mídia sosiál, tamba aktu ida ne’e nu’udar aktu ida ne’ebé la edukativu.

Notísia Relevante: Veteranu Aquito: “Governu Presiza Kria Lei Hodi Asegura Oan-Ki’ak Sira” 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here