DILI, 02 marsu 2020 (TATOLI)–Arguidu CDC ne’ebé tenta taa membru FALINTIL-Forsa Defeza Timor-Leste (F-FDTL), foin lalais ne’e, iha Jardim 05 de Maio, Colmera, Dili, tama ona prizaun preventiva.
Notísia Relevante : Suspeitu CDC Tenta Taa Membru F-FDTL
Tribunál Distritál Dili (TDD) liuhosi audiénsia julgamentu primeiru interrogatóriu, segunda (02/03/20), aplika prizaun preventiva ba arguidu CDC ba aktu krime tentativu omisídiu ne’ebé previstu iha artigu 139 Kódigu Penál Timor-Leste no krime arma branka lei númeru 5/2007.
Advogadu Henrique Maris, informa, razaun Tribunál aplika prizaun preventiva tanba iha duni indísiu forte ho asaun arguidu nian.
Nia dehan, bainhira arguidu ba iha prizaun preventiva iha prova ruma karik mosu katak nia kondisaun seluk hanesan moras metál maka Tribunál sei altera medida koasaun ida-ne’e.
Audiénsia julgamentu ba kazu refere prezide hosi juíz singulár, Sribuana da Costa, Ministériu Públiku reprezenta hosi Prokuradora Ivonia Guterres no arguidu sira hetan asisténsia legál hosi Defensór Públiku, Henrique Maris.
Jornalista : Nelson de Sousa
Editór : Francisco Simões
