DILI, 02 marsu 2020 (TATOLI)–Prezidente Komisaun Nasionál ba Eleisaun (CNE-sigla portugés), Alcino de Araújo Barris, hateten iha tinan 2018 nia laran CNE organiza ona eleisaun ho susesu, tanba ne’e bainhira mosu tan Eleisaun Antesipada (EA), la’ós novidade tanba Komisaun ne’e sempre prontu.
“Hafoin eleisaun iha 2018, ami iha forsa administrativa, no komisáriu sira kada loron hala’o enkontru hodi diskute hela kona-ba asuntu sira-ne’e. Tanba ne’e, funsionáriu sira organizadu no integradu ona iha prosesu hotu, tanba ne’e la’ós novidade foun”, informa Alcino Barris hafoin enkontru ho Primeiru-Ministru (PM), Taur Matan Ruak iha Palásiu Governu, Dili, segunda ne’e.
Notísia Relevante: Antesipadamente PM Taur Buka Hatene Ona Kondisaun STAE, Karik Mosu EA
STAE Atualiza Serbisu Ba Primeiru-Ministru
Prezidente CN haktuir, iha enkontru ne’e, Xefe Governu refere uitoan kona-ba EA maibé kestaun ne’e hanesan últimu rekursu bainhira laiha ona solusaun entre líder sira.
“Primeiru-Ministru dehan mai ami katak bainhira líder nasionál sira hasoru-malu, iha pontu ida hetan konkluzaun katak se laiha dalan tan ona mak ba Eleisaun Antesipada, ne’ebé hanesan última rekursu. Tanba ne’e, Primeiru-Ministru husu mai ami prontu ka lae? Ami hatán katak ida-ne’e la’ós ona novidade”, nia salienta.
Alcino Barris subliña, bainhira atu iha EA iha tinan ida ne’e normál hanesan nasaun demokátiku ida.
Antes ne’e, Xefi Governu bolu autoridade Sekretriadu Téknika Administrasaun Eleitorál (STAE) hodi hatene kona-ba kondisaun servisu.
Jornalista: Antónia Gusmão
Editora: Julia Chatarina
